U-Ouaddou akayixegiselanga iCasric – ufuna ukudlula
I-Orlando Pirates ibuyela e-Orlando Amstel Arena kulo Mgqibelo ngethemba lokupholisa amanxeba okuhlulwa kwaphakathi nesonto.
Lezi ziqhwaga zaseSoweto zikhutshwe yiMamelodi Sundowns emdlalweni weligi wasekhaya kodwa obuseFNB Stadium ngoLwesithathu.
Futhi manje ibuyela enqabeni yabo i-Orlando Amstel Arena ngomdlalo obalulekile weNedbank Cup la izogadulisana khona neCasric Stars.
Ngemuva kokuhlulwa kabuhlungu ngo 2-1 yizimbangi zayo esicocweni seligi, umqeqeshi u-Abdeslam Ouaddou ukhethe ukuliqinisa iqembu adlala ngalo.
Uhla lwabadlali abaqala umdlalo luveza ukuthi uzoqhubeka nohlaka lwe-4-3-3, oludle ngokuhlasela kakhulu.
UMTHWALO WAMAGOLI
Njengoba iSoweto Derby, la izobhekana khona neKaizer Chiefs ilenga phezu kweqembu lakhe, u-Ouaddou ubanike ikhefu abanye babadlali bakhe abajwayeke ukuqala imidlalo.
Nokho lokho akusho ukuthi uyixegisele iCasric Stars njengoba enikeze abadlali abasafuna ukuzakhela igama ithuba.
- Amathemba kuDe Jong: U-Andre de Jong nguye ohola ukuhlasela kwe-Orlando Pirates.
Uzolekelelwa uTshepang Moremi odle ngejubane noRelebohile Mofokeng odle ngobuhlakani bamaphasi amahle. - Injini esiswini: UMakhehlene Makhaula uyaqhubeka nokuba yinkika yeqembu esiswini la kubhekwe anqamule iminyakazo yeStars.
Uzolekelelwa uPatrick Maswanganyi noMasindi Nemtajela okubhekwe bahlanganise iminyakazo eya phambili. - Udonga lwasemuva: UNkosinathi Sibisi ungukaputeni weqembu kanti uzobambisana nomdlali omusha uMpho Chabatsane.
Ezinhlangothini kukhona uDeano van Rooyen noDeon Hotto okulindeleke balekelele uma kuyiwa phambili kuhlaselwa. - Epalini: Yize bekubhekwe ukuthi kunikwe uMelusi Buthelezi ithuba, umqeqeshi unqume ukuqhubeka noSipho Chaine
UMTHELELA WEBHENTSHI
Ibhentshi le-Orlando Pirates ligcwele abadlali abangakwazi ukungena bajike izinto uma leli qembu leMotsepe Foundation Championship libathwalisa kanzima.
U-Oswin Appollis noYanela Mbuthuma osemncane banikeza izinketho ezinamandla uma umdlalo usuya ngasekupheleni kungalungi.
Umdlali waseZimbabwe uDaniel Msendami naye uphakathi kwabasebhentshini okuzolindeleka bangene bajike izinto.
Lolu hlu luphakamisa ukuthi u-Ouaddou ubeka phambili ukugcinwa kwebhola nokucindezela phambili ukuze agweme ukukeqwa yileli qembu abangalazi kahle.
FUNDA NALA | UCardoso ugembulile, zamdida izinduku zeGalaxy
Ngenkathi izihlabani ezimbalwa ziphumule, ukufakwa kukaDe Jong noMoremi kukhombisa isifiso sokusheshe kuqedwe ngaolo mdlalo.
Lokho kuzokwenza amalungiselelo omdlalo weligi neChiefs angabi nengcindezi enkulu kakhulu.
