UVilakazi nomlayezo kuMofokeng obheke eBelgium
Isihlabani esisesincane seKaizer Chiefs, u-Mfundo Vilakazi, sesithumele umlayezo wokuhalalisela u-Relebohile Mofokeng.
Lokhu kuza ngemuva kokuba i-Orlando Pirates iqinisekise ukuthi uMofokeng usendleleni ebheke eBelgium la asezodlala khona.
IPirates imemezele ngoLwesithathu ekuseni ukuthi isifinyelele esivumelwaneni neqembu laseBelgium, iRoyale Union Saint-Gilloise ngokudayisa lo mdlali oneminyaka engu-22 ubudala.
Nokho, ukuhwebelana kusancike ekutheni uMofokeng aphumelele ekuhlolweni kwezempilo aphinde avumelane neqembu ngemibandela yenkontileka yakhe.
Lo mdlali kulindeleke ukuthi atheleke eBelgium ezinsukwini ezimbalwa ezizayo, lapho ezobe eseqala khona isahluko esisha emsebenzini wakhe.
Ngemuva kwesimemezelo sePirates, u-Mfundo Vilakazi ungene ku-Instagram wathumela umlayezo wokuhalalisela u-Relebohile Mofokeng.
Le ntwana yeChiefs ibhale yathi: “Inhliziyo yami yenelisekile… Ngikufisela okuhle kodwa Njayami, uNkulunkulu askubusise President yama2K.”
Lo mlayezo usheshe wadonsa amehlo abalandeli, abaningi bencoma ukuhloniphana phakathi kwalezi zihlabani ezimbili, yize zidlalela amaqembu amakhulu ayizimbangi.
- FUNDA NALA | UDolly usededeliwe kwabedlala kulo
Ukuya kukaMofokeng eBelgium kubhekwa njengesinye isinyathelo esikhulu emsebenzini wakhe.
Futhi kulindeleke ukuthi kukhuthaze abanye abadlali abasebancane baseNingizimu Afrika ukuthi balwele ukufeza amaphupho abo okudlala ephesheya.
- EZISHISAYO| Cofa lapha usithole kuWhatsApp
