UPhili uveza okumholele kwiKaizer Chiefs
Umdlali omusha we-Kaizer Chiefs, u-Langelihle Phili, uthi uzizwa njengomuntu ozelwe kabusha njengoba esejoyine leli qembu.
Uthi kufezeke iphupho lakhe ngemuva kokusayina neqembu aakhule elikhonzile futhi engumlandeli walo omkhulu.
Lo mdlali oneminyaka engu-21 ubudala ujoyine Amakhosi kuleli sonto esivumelwaneni esibandakanye u-Ashley Du Preez noGiven Msimango abaye kwiStellenbosch FC.
UPhili waqala ukudlala ezikhungweni zokuthuthukiswa kwabadlali zaMaZulu ngaphambi kokujoyina iStellenbosch ngoJulayi ka-2023.
Lokhu kwalandela ukudlala kahle kwakhe emqhudelwaneni we-Engen Knockout, lapho aqokwa khona njengomdlali ovelele.
Ngesikhathi ekwiStellenbosch, udlale imidlalo engu-46, washaya amagoli ayisikhombisa, wakhela ozakwabo amabili.
Wonke amagoli akhe uwashaye ngesizini edlule, wagcina eqokwe njengomdlali ovelele weStellenbosch.
Ekhuluma nabesizindalwazi se-Kaizer Chiefs, u-Langelihle Phili uthe ukhulele emndenini wabalandeli baMakhosi.
“Ngidlale amasizini amabili kwiStellenbosch, manje ngijabule kakhulu ngokujoyina iChiefs,” kusho uPhili.
“Into yokuqala engiyikhumbulile ugogo wami ongasekho emhlabeni.
“Wayengumlandeli omkhulu weKaizer Chiefs futhi sasivame ukubukela imidlalo ndawonye ngisemncane.
“Wonke umuntu ekhaya ungumlandeli weChiefs, ngakho ngibone kuyisinyathelo esihle ukujoyina iqembu engakhule ngililandela.
“Ukuba lapha kwenza ngizwe sengathi iphupho lami selifezekile.
“Sengijahe ukuhlangana nabanye abadlali abangozakwethu, nabaqeqeshi bese ngiqala umsebenzi.”
- FUNDA NALA | UParker uphawula ngomdlalo wezigemegeme
U-Langelihle Phili uphinde wabonga abalandeli be-Kaizer Chiefs ngokumamukela ngemfudumalo nangesasasa elikhulu.
“Ngiyabonga ngokungikhetha. Sengifikile futhi ngifuna ukuninqobela izindebe, sakhe nezinkumbulo ezinhle ndawonye.”
- EZISHISAYO| Cofa lapha usithole kuWhatsApp
