OweHope FC uchaza ‘ngokuphoxa’ uZwane wodumo kwiChiefs
Umqeqeshi weHope FC, uClayton Daniels, usechaze isizathu esenze wakhipha obengumdlali wasesiswini we-Kaizer Chiefs, uSamkelo Zwane, ngesikhathi sekhefu emdlalweni wangoLwesihlanu.
IHope FC ibambane ngo-1-1 neLerumo Lions emdlalweni weMotsepe Foundation Championship obuseDobsonville Stadium.
Lo mdlalo ububalulekile kuZwane njengoba ebebuyele eSoweto okokuqala selokhu iChiefs yambolekisa ngaphambi kokuqala kwesizini.
Naphezu kokudlala kahle esiwombeni sokuqala, uZwane ukhishwe ngesikhathi sekhefu kwangena uTaahir Goedeman endaweni yakhe.
UDaniels ugcizelele ukuthi lesi bekuyisinqumo samacebo okudlala kuphela, hhayi ukuthi u-Samkelo Zwane ubengadlali kahle.
“Yebo, bekuwushintshi lwamaqhinga kuphela,” kusho lo mqeqeshi kwiSoccer Laduma.
“Akukho lutho olubi ngoSamkelo. Besidinga umdlali ozokwazi ukuya nebhola phambili ngokushesha. UGoedeman usinike lokho.”
UDaniels uphinde wachaza ukuthi uZwane unamandla uma iqembu liphethe ibhola ngoba uyasiza ukulawula umdlalo.
“USamkelo ungumdlali okuthi uma siphethe ibhola kakhulu, akwazi ukwehlisa ijubane lomdlalo, akwazi nokudlala amabhola amade,” kuqhuba yena.
Nokho, lo mqeqeshi uthe ubejabule ngendlela uZwane adlale ngayo esiwombeni sokuqala.
“Wenze kahle esiwombeni sokuqala. Kodwa bengidinga umuntu ozothwala ibhola alihambise phambili kakhulu. Bekuyinguquko yamaqhinga kuphela.”
UDaniels uphinde wakhungatheka ngokulahlekelwa amaphuzu amathathu ngemuva kwekhefu elide lebhola lamazwe ngamazwe.
“Amaphuzu amathathu lapha namuhla abezobaluleka kakhulu kithi, ikakhulukazi emdlalweni wethu wokuqala ngemuva kwekhefu.
“Kodwa singenzani? Sizolithatha iphuzu,” kuqhuba yena.
- FUNDA NALA | OwePirates nethemba ngomlando kwiMTN8
“Akulula ukuza lapha ngemuva kokungadlali, ngicabanga ukuthi amasonto amabili kuya kwamathathu ngenxa yekhefu.
“Kumele sibuyele emqgigqweni wethu. Imidlalo emibili elandelayo isekhaya, ngakho ngethemba ukuthi sizowathatha wonke amaphuzu.”
- EZISHISAYO| Cofa lapha usithole kuWhatsApp
