U-Itu Khune usola abadlali beKaizer Chiefs ‘ngokweyisa’
Ingwazi yeKaizer Chiefs u-Itumeleng Khune isingene ezinkundleni zokuxhumana yadedela amazwi ahlabayo kubadlali baleli qembu.
Esigamekweni esingajwayelekile le nsizwa eyayingukaputeni waMakhosi isole abadlali abakhona njengamanje ngokudelela umlando weqembu nobuholi balo.
AMAZWI ASHUBILE
Kulandela umphumela womdlalo obuseFNB Stadium lapho i-Orlando Pirates inqobe khona iligi ngo 3-0 uKhune ubhoke ngolaka.
Izithombe zika-Itumeleng Khune ebonakala echiphiza izinyembezi ngemuva komdlalo zikhombise ngokusobala uthando lwakhe lweKaizer Chiefs.
“Baf’wethu, okungenani hloniphani usihlalo, izingzwazi nabalandeli abathembekile baMakhosi. Ukungahloniphi nhlobo lokhu,” kubhala uKhune.
Lo mlayezo wakhe ubonakala njengokukhathazeka okukhona “ngokungakhombisi ukuzinikela” kwababadlali emizuzwini engu-90.
IChiefs ihlulekile ukukhahlelela ipali ngesiwombe sokuqala lapho ibibukeka ilandela izithunzi.
OKUCASULE UKHUNE
Ukukhungatheka kuka-Itumeleng Khune kulandela isonto elibe limbi kwiKaizer Chiefs elithikameze izifiso zayo zesizini:
- Umphumela wedabhi: ihlulwe ngo 3-0 – amagoli ePirates ashaywe oTshepang Moremi, Oswin Appollis, no-Evidence Makgopa.
- Ukuhlulwa okulandelanayo: Lokhu bekuwukuhlulwa kwesithathu kweChiefs kulandelana kuyo yonke imiqhudelwano.
- Ukushoda kobuholi: Njengoba ukapteni uBrandon Petersen engekho ngenxa yokugula okuholele ekuhlinzweni okuphuthumayo, iqembu libonakale “libanda” futhi lingenamholi enkundleni.
- Ukuhlulwa kweyezindebe: Le kilabhu isanda kukhishwa kwiCaf Confederation Cup neNedbank Cup.
Lokhu kushiye iligi kuwukuphela kwendebe leli qembu okumele ligxile kuyo — kodwa njengamanje ilandela iPirates ngamaphuzu angu-11.
INGABE IQEMBU LINEZINKINGA?
UKhune uchithe iminyaka engu-25 kuleli qembu futhi uwuphawu lwezinga elidingeka kumdlali waMakhosi.
Uhlale ekhuluma ngesidingo sokuthi abadlali basiqonde isisindo sejezi leChiefs nokulindeleke kubo.
Ukugxeka kwakhe ‘abafowabo’ esidlangalaleni kugqamisa ukungenami okukhulayo phakathi kwezinkakha zeqembu nabadlali abakhona njengmanje.
UKhune akuyena yedwa ingwazi engenelisekile ngeChiefs, umuzwa wabo ume kanje:
- Izingwazi: Izinkakha ezifana noKhune zibona ukuthi “isiko” lekilabhu liyanyamalala.
- Abaqeqeshi: UCedric Kaze ukhombe “izinqumo zobuchwepheshe” nokulimala kungazelelwe kwabadlali abathile njengembangela yokubhimba kwezinto.
- Abalandeli: Nabo baveze ukungeneliseki kwabo ezinkundleni zokuxhumana futhi abaningi befuna kushintshwe ithimba labaqeqeshi.
Uma inkakha esezingeni lika-Itumeleng Khune isebenzisa amazwi athi “ukungahloniphi nhlobo,” lokhu okwenziwe abadlali beKaizer Chiefs, kukhomba ukuthi ukukhungatheka kungaphezulu komphumela omubi nje kuphela.
Kuphinde kuphakamise inkinga yesiko eNaturena. Kubadlali, ukuphela kwendlela yokuziphendulela kulokhu wukwenza kahle enkundleni.
FUNDA NALA | Kukhale izembe kumqeqeshi welePSL
Kanti lokho kumele kuqale ngomdlalo wabo olandelayo weligi lapho bezohlangana khona neRichards Bay FC eMhlathuze Stadium ngoLwesibili.
