U-Itu Khune ucasisa eyokuthatha ‘umhlalaphansi’
Obengunozinti ohamba phambili kwiKaizer Chiefs iminyakanyaka, u-Itumeleng Khune useveze ezintsha ngekusasa lakhe njengomdlali.
Le nsizwa eyayiyisihlabani seBafana Bafana ikuqinisekisile ukuthi ayikayeki ukudlala ibhola elikhokhelayo.
Empeleni isabambelele ethembeni lokuthi lizovela elinye ithuba lokuthi ibuyele ebholeni elikhokhelayo maduze.
U-Itumeleng Khune, oneminyaka engu-37, uhlale iminyaka engu-20 kuMakhosi kodwa washiya ekupheleni kwesizini edlule.
Udlale imidlalo engaphezu kuka-280 kuleli qembu futhi waba ngukaputeni iminyaka eminingi.
Yize esehlukene neChiefs, u-Itumeleng Khune umile kwelokuthi usenakho okudingekayo ukwenza umsebenzi wokuvimba.
“UNkulunkulu kuphela ozonquma ukuthi sekushaye isikhathi sokuyeka,” usho kanje uKhune kwi-iDiski Times.
“Njengamanje, ngisafuna ukudlala. Ngizigcina ngisesimweni esifanele ngokuthi ngidlale ibhola le-5-a-side.
“Lokhu ngikwenzela ukuthi ngihlale ngilungule ukuthi uma kungena ucingo oluthi, ‘Itu, sidinga usizo lwakho’ ngigxume ngihlale.”
UKhune ubengakazidayisi emaqenjini okwamanje kodwa uthi uzigcina ematasatasa ngezinto azenza ngaphandle kwenkundla.
Uthathe izindima ezimbalwa njengokuba ngumhlaziyi weSABC Sport nenxusa lomkhiqizo weNedbank Cup neTopbet.
“Engigxile kukho manje yiSABC, yiNedbank, yiTopbet, neStudio 88,” kwengeza uKhune.
“Kulapho isinkwa sami sivela khona njengamanje. Kodwa uma iqembu lifona, ngizomisa konke lokho bese ngibuyela enkundleni.”
Le nkunzi ayayisihlabani seBafana Bafana ikholwa ukuthi iminyaka ayisho lutho, yinombolo nje.
Wenze isibonelo sikaDenis Onyango weMamelodi Sundowns osadlala yize emdala kunaye.
“Uma u-Onyango esahamba ngamandla eneminyaka engu-39, kungani kufanele ngiphuthume empeshenini ngineminyaka engu-37?” kubuza yena.
“Ngisesesimweni esihle. Uma ucingo lungangena, namanje ngingahamba.”
Yize amakilabhu engakafiki ukuzofongqa isiqgoko amcele ukuba awajoyine, uKhune usazigcina esesimweni ngenhloso yokuwaheha.
Okwamanje, usengomunye wonozinti baseNingizimu Afrika abanamava kakhulu nabahlonishwayo.
Iqembu elizomsayina lizothola okungaphezulu kukanozinti nje, kodwa umdlali onerekhodi elihle lokuziphatha.
