UDolly usejima kwelinye iqembu lePSL
Owayengumdlali weKaizer Chiefs uKeagan Dolly ubonakale ezilolonga neqembu elisha njengoba esaqhubeka nokuthungatha iqembu elisha.
Lo mdlali oneminyaka engu-31 ubudala, udedelwe Amakhosi ekupheleni kwesizini edlule.
Ubeziqeqesha neSuperSport Unites kulamaviki ambalwa edlule, kodwa ngoMsombuluko uqale ukuzilolonga neTS Galaxy.
IRockets ethakwe ngabadlali abasebancane, ingazuza kumava kaDolly osebuya naphesheya kwezilwandle.
Leli qembu lisanda kuhlukana noSead Ramovic obengumqeqeshi, kwangena u-Adnan Beganovic esikhundleni sakhe.
Kubikwa ukuthi uBeganovic uzimisele ngokwengeza uDolly esikwatini sakhe.
Kodwa okwamanje le kilabhu isafuna ukumhlola ukuthi usakulungele yini ukudlala ngaphambi kokuthatha isinqumo esingujuqu.
UDolly uke waziqeqesha neSuperSport United, kodwa iqembu laseTshwane alizange limsayinise.
Naphezu kwesinqumo sekilabhu, uDolly uqhubekile nokuzilolonga noMatsatsantsa ukuze azigcine efithi.
Nakuba evinjwe ukulimala nokushintshashintsha njalo kwabaqeqeshi kwiChiefs, umthelela kaDolly ubungenakuphikwa.
Esikhathini sakhe kwiChiefs, ushaye amagoli angu-14, wakha angu-11 emidlalweni engu-67.
Lo mbiko ucashunwe kwiFARPost
