UKhoza ushwabulele ‘abakhuluma kabi’ ngePirates
Usihlalo we-Orlando Pirates u-Irvin Khoza usethule umyalezo onamandla kulandela isizini eyingqophamlando yaleli qembu.
Ukhumbuze abbebegxeka nabalandeli ngokufanayo ukuthi le mpumelelo akubanga ucilo ozishayisa endukwini.
Esitatimendeni eside, uKhoza uphendule ngokuxinwa ngokuthi leli qembu liqede isomiso“seminyaka engu-14.”
IPirates inqobe isicoco seBetway Premiership kule sizini, yaphinde yaphakamisa iMTN8 neCarling Knockout.
Iqembu lenkulisa nalo libe selidla eye-DStv Diski Challenge okokuqala ngqa.
UKhoza uveze ukuthi ngesikhathi okukhulunywa ngaso, iPirates ibiqhubeka iqoqa izindebe.
Baphinde bafinyelela kowamanqamu kwiCaf Champions League neConfederation Cup, beyilokhu uyiqembu elidlla kahle.
U-Iron Duke uchaze ukunqoba iligi njengokuqinisekisa ukuthi ikilabhu ibuyela esicongweni sebhola laseNingizimu Afrika.
“Enye yezindikimba ezihamba phambili kube wukuthi: ‘ngemva kwesomiso seminyaka engu-14’,” kubhala uKhoza.
“Kodwa ngaleso sikhathi i-Orlando Pirates inqobe izicoco ezinhlanu zeMTN8, ezintathu zeNedbank Cup neyodwa yeCarling Knockout.”
U-Irvin Khoza uphinde wancoma ukubuya kwabalandeli be-Orlando Pirates ngobuningi ezinkundleni.
Kwenye yezingxenye eziqine kakhulu zesitatimende sakhe, ukhumbuze ikilabhu ukuthi osekunqotshiwe akusasho lutho.
“Uma kunesifundo esisodwa ibhola elingifundise sona, wukuthi awukwazi ukomisa izimpahla oziwashe namuhla ngelanga layizolo,” kuqhuba yena.
U-Irvin Khoza uphethe ngokubonga wonke umndeni we-Orlando Pirates ngalokho akubiza ngokuthi “isizini yomsebenzi, izinkumbulo nokubuya ngamandla.”
