UHlungwani uphawula ngamaphenathi ‘ancishwe’ i-All Stars
Owayengunompempe wePSL uVictor Hlungwani usephawule ngezigameko ezimbili ezisuse umsindo emdlalweni weCarling Cup ngempelasonto edlule.
I-Orlando Pirates ishaye iCarling All Stars ngo 2-0 eMoses Mabhida Stadium ngoMgqibelo ukuze ibe ngompetha bale ndebe.
Kodwa okushiye ubumuncu kubalandeli bamanye amaqembu izigameko ezimbili abakholwa wukuthi bekumele ziphethe ngokubekelwa kwe-All Stars amaphenathi.
Esigamekweni sokuqala, umhlaseli weKaizer Chiefs uMfundo Vilakazi uwele ngaphakathi ebhokisini ngemuva kokumakana noMakhehleni Makhaula.
“Sizobheka eThekwini… Emdlalweni we-Orlando Pirates neCarling All Stars. Kunezikhalo ngephenathi kaVila,” kusho uVictor Hlungwani.
“Masibheke ukuthi uVila ukhahleliwe noma cha. Uma uyibuka kahle uzobona ukuthi unompempe unikeza ikhadi eliphuzi kuye ngokulingisa.
“Kodwa ake sibheke ukuthi ngabe likhona yini icala. Uyabona ukuthi uMakhaula ukhahlele ibhola.
“Uma ukhahlela ibhola alikho icala elenziwe. Uyabona lapho ukuthi uMakhaula ukhahlele ibhola – udlale ibhola.
“Ngakho akukho cala futhi kube yisinqumo esifanele sikanompempe ukuthi angayibeki iphenathi,” kusho uHlungwani.
Esigamekweni sesibili umdlali wasemuva wePirates u-Olisa Ndah ubambe uNaledi Hlongwane, wamncisha ithuba lokudlala ibhola engaphakathi ebhokisini.
“Kwesilandelayo… sibona uNaledi Hlongwane ebhudubezwa ngu-Olisa Ndah.
“Uma ubuka kahle ubambe uNaledi engaphakathi ebhokisini,” kuqhuba le nsizwa eyayingunompempe manje esingumhlaziyi.
“Ukubamba kumele kube nomthelela okusho ukuthi kufanele kuvimbele umuntu ukuthi adlale ibhola noma azibeke ethubeni lokushaya igoli.
“Ngakho lapha uNaledi uvinjiwe futhi bekufanele kubekwe iphenathi.
FUNDA NALA | UYeye uveza okwenza ashiye kwiChiefs
“Kodwa akuzange kwenzeke kanjalo futhi lokho kube yisinqumo esingalungile sikanompempe.”
ZITHOLE ZISHISA: Cofa lapha usithole kwiWhatsApp Channel yethu
