IDurban City nenyuvesi nesivumelwano sokukhulisa ibhola
Esinyathelweni esibheke ekuthuthukisweni kwebhola KwaZulu-Natal, i-University of KwaZulu-Natal (UKZN) ne-Durban City basayine isivumelwano sokusebenzisana.
Inhloso yalesi sivumelwano wukuthuthukisa ezemidlalo ngokubambisana phakathi kwalezi zinhlaka.
Lesi sivumelwano, esisayinwe ngoMashi 25, sizogxila ekuthuthukisweni kwebhola, ukwabelana ngolwazi, nokuxhumana nomphakathi.
Sihlanganisa ndawonye amandla ezemfundo nocwaningo kwe-UKZN nolwazi lwebhola lwe-Durban City.
Amaphuzu avelele ngalokhu kubambisana:
✅ Imifundaze kubadlali abanekhono nabafanelekile
✅ Amaphrojekthi okuthuthukisa ibhola aqhutshwa ngokuhlanganyela yizinhlangothi zombili
✅ Ukusebenzisana ezikhungweni zemidlalo ze-UKZN nezinye izinsiza
✅ Ukusekelwa kokuqeqeshwa kwezinga eliphezulu ohlelweni lwebhola le-UKZN
✅ Amathuba okufunda ngomsebenzi namathuba okuqeqeshwa kubafundi base-UKZN
✅ Ukumaketha nokusebenzisana kwezohwebo
I-UKZN ihlose ukuphakamisa iphrofayili yayo yezemidlalo eminyakeni emithathu ezayo ngokutshala imali kwingqalasizinda, ukuthuthukiswa kwabadlali nokusebenzisana okubalulekile.
UNormah Zondo, uMqondisi mkhulu eezobudlelwano bebhizinisi e-UKZN, ugcizelele ukubaluleka kwalokhu kubambisana.
“Lobu budlelwano buhambisana nombono wethu wokubuyisela i-UKZN Sports endaweni yayo efanele.
“Sikholwa ukuthi lokhu kubambisana kuzozuzisa wonke amaqembu ebhola e-KZN,” kusho yena.
Njengoba iDurban City iqhwakele kwilogi yeMotsepe Foundation Championship, leli qembu libheke ukukhuphukela kwiBetway Premiership ngesizini ezayo.
“Lobu budlelwano buhlanganisa uthando lwezemidlalo namandla emfundo,” kusho usihlalo weqembu uFarouk Kaddodia.
“Buzokwakha amathuba kubafundi besayensi yezemidlalo, abezokumaketha, abebhizinisi, nokuqeqesha…
“Buzophinde buvulele abadlali bethu ithuba lokufinyelela ocwaningweni olusezingeni lomhlaba nezinsiza.”
Lokhu kubambisana kuphawula inkathi entsha yebhola nemfundo KwaZulu-Natal, ethembisa ukukhula okufanayo nezinzuzo zesikhathi eside.
