U-Allan Freese ‘ugolozela’ abaphathi ngeyokuxoshwa
Umqeqeshi weMagesi FC, u-Allan Freese usephumele obala wathi uma abaphathi benenkinga ngemiphumela, abake baqale babheke abadlali hhayi yena yedwa.
Ikusasa likaFreese kuleli qembu laseLimpopo liyacikiza njengoba esahlulekile ukulikhipha ezindaweni zezembe ezigaxele kuzo.
Kodwa lo mqeqeshi uthi iqembu lakhe libulawa ubuthuntu phambi kwepali wathi ngakho ngabadlali okumele babhekwe.
“Hhayi-ke angazi, kulele kubaphathi,” kusho u-Allan Freese uma ebuzwa ngekusasa lakhe kuleli sonto.
“Kodwa ngicabanga ukuthi abaphathi kumele baqale babheke ukuthi kwenzakalani enkundleni.
“Akumele babheke umqeqeshi yedwa; kumele babheke ukuthi kwenzakalani nakubadlali.
“Ngingakutshela nje ukuthi sibe namathuba angu-13 amahle okushaya igoli emdlalweni wokugcina sibhekene neSekhukhune United,” kwengeza yena.
U-Allan Freese ubekhuluma ngaphambi komdlalo weqembu lakhe neKaizer Chiefs ePeter Mokaba Stadium ngoLwesithathu ebusuku.
Yize ehlulwe ngo 2-0 Amakhosi ekuhambeni ngenyanga edlule, kodwa usamile kwelokuthi iqembu lakhe lingawuthola umphumela uma lingasebenzisa kahle amathuba eliwatholayo.
“Angicabangi ukuthi emdlalweni wasekuhambeni sibhekene neChiefs senza kabi, angikholwa,” kwengeza uFreese.
“Kwaba yiyo leyo ndaba yokuhluleka ukufaka ibhola enethini. Kwaba yinkinga efanayo.
“Ngakho-ke sizosebenza ukuyilungisa njalo nje – sikhuthaze abadlali ukuthi bakhahlelele ipali.”
Lo mdlalo weBetway Premiership uhlelelwe ukuqala ngo-7.30 ebusuku kanti ubalulekile kuwo womabili amaqembu ngezizathu ezihlukene.
