U-Adolf Mtasingwa weChiefs ufaniswa nesihlabani saseFrance
Owayengumqeqeshi weqembu lesizwe laseTanzania, u-Adel Amrouche, usencome ikhono lomdlali omusha weKaizer Chiefs, u-Adolf Mtasingwa Bitegeko.
Indlela lo mqeqeshi amncoma ngayo lo mdlali uze wamfanisa nesihlabani saseFrance uPaul Pogba.
Amakhosi asanda kumemezela ukusayina lo mdlali wasesiswini oneminyaka engu-27 ubudala esuka kwi-Azam FC yaseTanzania.
Usayine inkontileka yeminyaka emibili, enenketho yokwelulwa ngomunye unyaka.
U-Adolf Mtasingwa ube ngumdlali wokuqala waseTanzania ukugqoka ijezi le-Kaizer Chiefs.
U-Amrouche, owamnika ithuba lokuqala ukudlalela iTanzania, uthi lo mdlali usenamandla okwenza okukhulu ebholeni.
“Unobude obuhle futhi udlala ibhola elilula. Akazenzi izinto zibe nzima enkundleni.
“Angaba ngcono kakhulu uma edlala eqenjini elimethembayo,” kusho u-Amrouche kwiFARPost.
Uthe indlela kaMtasingwa yokudlala imkhumbuza uPaul Pogba.
“Ufana noPogba. Unekhono lokuphasa ibhola eduze nakude.
“Ngamfaka eqenjini lesizwe ngesikhathi engenalo neqembu. Uthobekile futhi unekhono elihle kakhulu,” kwengeza yena.
Owayedlala naye kwi-Azam FC, uPrince Dube, naye ukholwa ukuthi u-Adolf Mtasingwa uzoba wusizo olukhulu kwi-Kaizer Chiefs.
UDube uthe lo mdlali ungumdlali wasesiswini oqinile, ovikela kahle emuva futhi okwazi ukugcina ibhola.
Nokho, uvumile ukuthi kuzomele ajwayele ijubane lebhola laseNingizimu Afrika.
UMtasingwa uchithe iminyaka eyisithupha edlala e-Iceland, eNorway naseFinland ngaphambi kokubuyela eTanzania ngo-2024, lapho aba ngukaputeni we-Azam FC.
- FUNDA NALA | Ingwiji kwekaMosele neDurban City
Nakuba elinyazwe ngesikhathi esiningi sesizini edlule, iChiefs inethemba lokuthi uzosheshe ajwayele impilo eNaturena futhi abe yisixazululo esifunwa isikhathi eside enkabeni yenkundla.
U-Adolf Mtasingwa ujoyina i-Kaizer Chiefs ngesikhathi esibucayi iqembu lizihlela kabusha futhi kunenhlokomo ngekusasa likaThabo Cele eqenjii.
- EZISHISAYO| Cofa lapha usithole kuWhatsApp
