U-Ouaddou ucacisa indima kaMaswanganyi kwiBucs

Umqeqeshi we-Orlando Pirates u-Abdeslam Ouaddou ukholwa ukuthi u-Patrick Maswanganyi uhlalelwe wumsebenzi omkhulu kuleli qembu kulandela ukuhamba kukaRelebohile Mofokeng.

UMaswanganyi ube nesandla esikhulu ekunqobeni kwePirates ngo 3-0 ibhekene neChippa United emdlalweni weBetway Premiership ngeSonto.

Nguye ophakele uGhampani Lungu ibhola eliholele egolini lokuqala kulo mdlalo obuseKings Park Stadium eThekwini.

Uphinde waba nomthelela omuhle kwiMTN8 kule sizini la iPirates seyingene khona esigabeni semidlalo eyandulela owamanqamu.

U-Ouaddou ukholwa ukuthi uMaswanganyi unekhono lokuba ngumdlali obalulekile owakha amathuba okushaya amagoli kwiPirates.

“Angaba ngumxhumanisi phakathi kwabadlali basemuva nabagadli,” kusho u-Ouaddou.

Lo mqeqeshi ukholwa nokuthi uMaswanganyi angakwazi ukushaya amagoli amaningi.

“Uyakwazi ukudlala ibhola endaweni yokugcina, kodwa futhi uyakwazi nokushaya amagoli,” kwengeza yena.

U-Abdeslam Ouaddou uthi u-Patrick Maswanganyi usebenze kanzima nasejimini, okukhomba ukuzimisela kwakhe ukuba ngumdlali omqoka eqenjini.

Uthi uyayiqonda indima elindelwe kuye.

“Ngokuhamba kukaRele, unendawo enkulu yokudlala nendima enkulu okufanele ayidlale kule kilabhu,” kusho u-Ouaddou.

• FUNDA NALA | UTitus useshiyile kwiStellies, ulandela uMabasa

UMaswanganyi ngomunye wabadlali abazobe bebhekiwe uma iPirates seyibhekene neSekhukhune United ngempelasonto. 

• EZISHISAYO| Cofa lapha usithole kuWhatsApp