Sezigawulwe zabekwa kwidabhi yaseSoweto: zibophele kanje
I-Orlando Pirates izothola ithuba lokuhlala esicongweni seBetway Premiership uma ingayinqoba iKaizer Chiefs emdlalweni omkhulu weSoweto Derby ngoMgqibelo ntambama.
La maqembu azotholana phezulu eFNB Stadium ngo-3,30, kanti bobabili abaqeqeshi, u-Abdeslam Ouaddou noFernando Da Cruz, sebeveze abadlali abazobathemba kulo mdlalo.
IPirates isendaweni yesibili ngamaphuzu angu-22 emidlalweni eyisishiyagalombili.
Isalele ngephuzu elilodwa kwiMamelodi Sundowns esesicongweni, kodwa esidlale umdlalo owodwa ngaphezulu. Ukunqoba kuzoyinyusela phezulu.
Ezika-Ouaddou sezinemidlalo engu-21 zingahlulwa kwiBetway Premiership. Zagcina ukunqotshwa yiSundowns ngoFebhuwari.
Zishaye amagoli angu-19, okuyisibalo esingaphansi kweSundowns kuphela, kanti sezingenelwe igoli elilodwa nje kuphela kule sizini. Ziphinde zaba nesandla esiphezulu emidlalweni yakamuva yeSoweto Derby, zinqoba kwemihlanu kweyisithupha edlule.
Nokho, iChiefs nayo ayikaze ihlulwe kwiligi kule sizini. Inkinga yayo kube wukudlala ngokulingana, njengoba isithole amaphuzu aphelele emdlalweni owodwa kuphela kweyisithupha edlule.
Amakhosi asendaweni yesihlanu ngamaphuzu angu-14, asalela ngangu-9 kubaholi.
Isithunz sikaDa Cruz sinyukile ngemuva kokuthi uWandile Duba eshaye amagoli amathathu behlula iTS Galaxy ngo-3-0 kwiCarling Knockout Cup.
Lokhu kulandela ukuphuma kabuhlungu kweChiefs kwiConfederation Cup ibhekene neRed Arrows yaseZambia.
IChiefs izophinde ikhuthazwe ukunqoba kwayo iPirates kowamanqamu weNedbank Cup ngoMeyi 2025.
IPirates ibiphele kanje: Chaine, Ndaba, Seema, Sibisi, Hotto, Selepe, Mbatha, Mokobodi, Moremi, Masilela, Mbuthuma.
Ebhentshini: Dladla, Kgositsile, Padime, Zulu, Mthiyane, Lungu, Nkota, Makgopa, Appollis.
IChiefs ibophele kanje: Petersen, Frosler, Miguel, Moloisane, Mako, Maboe, Mthethwa, Vilakazi, Shabalala, Mmodi, Duba.
Ebhentshini: Bvuma, Kwinika, Dortley, Nkgwesa, Mabaso, Da Silva, Chislett, Velebayi, Abrahams.
- EZISHISAYO!|Â Cofa lapha usithole kuWhatsApp
