OwoKhozi ubabaza ‘is’dina’ kwababeka uMbokazi amabala
Umsakazi ongaconsi phansi kubalaleli boKhozi FM, uKhathide Ngobe – odume ngelikaTshath’ugodo – usekhwele wadilika kulabo abagxibha uMbekezeli Mbokazi.
UTshatha ubhale kwiFacebook ekhala ngabantu abalokhu bebelesela ngokuthi uMbekezeli Mbokazi mdala kunaleminyaka engu-20 okuthiwa unayo.
Lo mdlali wasemuva we-Orlando Pirates neBafana Bafana udlala ibhola elihle ngendlela yokuthi abaningi abakholwa wukuthi usengumfana omncane.
Echazwe yindlela aluse ngayo abagadli beNigeria emdlalweni wangoLwesibili, uTshatha ube esebhala ngalo mfanyana waseHluhluwe.
“Hhayi bafana bakithi ingwenya le suka,” kubhala lo msakazi owenza uhlelo lwantambama iWoza nabaNgani Bakho.
“Bayomkhohlwa befile labafana baseNajela ebesidlala nabo. Siyabezwake nalaba ababulawa umona wokubona ingane ivelela bese belokhu bebanga is’dina bethi mdala lomfana.
“Anoke nibuke idokhumentari kaBruce Lee lo owayenesibhaxu kusukela azalwa.
“Kwakungami lutho phambi kwakhe umfokaLee kusukela eneminyaka engu-18 eqala ukwephula abantu abadala kunaye izimbambo nemihlathi.
“Wathi eneminyaka engu-25 wayesebizwa ngaleligama elikhulu okuthiwa yiLegend (ingwazi).
“Umzimba waleya nsizwa wawuqine njengetshe, ekwazi ukushaya amaphushabhu angu-500 emi ngeminwe emibili nangezinzwane kuphela.
“Nalo mfana kaMbombokazi ke uphiwe itshe lomzimba ingane eluhlaza cwe lena.
“Khula TLB udlondlobale mfana ube ngangezintaba zoNdi Okhahlamba,” kuqhuba uTshatha kulo mbhalo wakhe.
Ube esemfanisa nenye insizwa yangakubo athi nayo yayinomzimba oqine njengoMbokazi, neyayidlala nabantu abadala kunayo ngakho lokho ukuthi yayiphiwe.
“Thina esakhula noWonder nje laphaya eMoscow abasimangazi oMbokazi ngoba noWonder kwakuyilenhlobo.
FUNDA NALA | Umunyu ku-Ouaddou ephawula ngengozi ecishe yamjuqa
“Sathi sifunda ePrimary wayesedlalela iqembu legenge endala yaseMoscow eyisitobha ngaleso sikhathi.
“Naye wayeyinsimbi kanje, kungadluli lutho, ishodi uma ekhahlela kwakungathi udubula ngesibhamu.
“Enjalo nje ejikanake yena kabi kabi. Eyi ngoba ukube iqiniso likhona ebholeni abantu baseNingizimu Afrika babeyobona lukhulu kuleya nsizwa.”
