OweCasric bekuthi akaqhume oweCity emthuka ngonina
Umqeqeshi we-Casric Stars, uBucs Mthombeni uthe usamthanda futhi usamhlonipha uRoger De Sa yize emthuke kabi ngonina ongasekho.
Lesi sigameko senzeke emdlalweni wokuhlunga iqembu elizongena kwiBetway Premiership obunezigemegeme ngoLwesithathu ntambama.
Lo mdlalo obuseSolomon Mahlangu Stadium uphele zibambene ngo 1-1 kanti uMthombeni ubecikeke kuthi akazithanqaze phansi.
Lokhu bekulandela ukuhilizisana kwakhe noDe Sa oyiphini lomqeqeshi weCape Town City amsole ngokumthuka ngonina.
Ukuveze lokhu esekhuluma ngemuva komdlalo, la ebebonakala khona ukuthi ucasuke ngampela.
“Bese belwa ngasekupheleni komdlalo. Kukhona ongithuke ngesiPutukezi,” kusho uMthombeni.
“Ungithuke ngomama… Yize ekusho ngesiPutukezi, ngoyazi usho ukuthini.
“Kodwa useyinkakha yami. Ngiyamthanda. Okungenani sisakwazi ukwangana naye.”
Uthe okumphoxile wukuthi umazi esadlala uDe Sa futhiu ungomunye wabadlali ayebathanda eqenjini leBafana Bafana eladla i-Africa Cup of Nations ngo-1996.
“Ngo-1996 ngangingumlandeli wakhe omkhulu. Ngiyaxolisa kuRoger. Yingakho abantu bengibuza ukuthi ngicasulwe yini kangaka.
“Uma uthuka umama wami, ebe eziphumulele emathuneni kumele ngenze ngendlela engenze ngayo.
“Kodwa ngiyaxolisa kuRoger, bekuwukucasuka nje kwasemdlalweni,” kuqhuba lo mqeqeshi.
I-Casric Stars isebenze kanzima ibuya kade seyilandela ngemuva kulo mdlalo, yagcina ikwazile ukuthola iphuzu.
ICity beyibekwe phambili uPrince Tjueza esiwombeni sokuqala la beyilawula khona umdlalo.
I-Casric Stars nokho ibuye ngamandla esiwombeni sesibili, futhi ukube ayibanga neshwa lokuhlulwa amathuba ngabe kukhulunywa okunye.
Igoli layo lokulinganisa lishaywe nguSphamandla Mlilo kade kuyiphenathi ebeke ngomzuzu wokugcina womdlalo.
