Owe-TS Galaxy ucacisa ngoSifiso Hlanti ojima nabo
Umqeqeshi weTS Galaxy, u-Adnan Beganovic, useveze okubambezele ukuthi uSifiso Hlanti asayine kuleli qembu.
UHlanti, owayengumdlali wasemuva kwesokunxele weKaizer Chiefs, akanaqembu kusukela ekupheleni kwesizini ka-2023/24.
Isikhathi sakhe seminyaka emithathu kuMakhosi siphele ngaphambi nje kokufika komqeqeshi uNasreddine Nabi eNaturena.
Lo mdlali oneminyaka engu-34 ubudala ujoyine iChiefs esuka kwiMoroka Swallows ngo-2021.
Udlale imidlalo engu-21 washaya igoli elilodwa ngesizini edlule.
Selokhu ashiya iChiefs, uHlanti ubezilolonga neTS Galaxy, enethemba lokuthola inkontileka.
Ngaphambi kwalokhu, ubemataniswa neRichards Bay, kodwa lokho kwagcina kungenzekanga.
UBeganovic, oqokwe njengomqeqeshi oyinhloko weGalaxy ngoNovemba, uchaze ukuthi uHlanti kumele ahlangabezane nemibandela ethile ukuze athole inkontileka.
“Ngesikhathi efika ngangimazi ngenxa yemidlalo eminingi engangiyihlaziya ngesikhathi sidlala neChiefs.
“Ngiyamazi, usilele emuva kwebesikulindele futhi udinga ukulungisa izingxenye ezithile zendlela yokudlala.
“Futhi ukuqina kubaluleke kakhulu ukuthi akulungise manje ngoba akakakulungeli ukudlala ngoba ube negebe elikhulu phakathi kwamakilabhu amabili.
“Futhi ngicabanga ukuthi izinyanga eziyisikhombisa akulula ukuzikhava,” uBeganovic usho kanje kwabeSABC Sport.
Naphezu kwalokhu kukhathazeka, uBeganovic uvumile ukuthi uHlanti ungumdlali osezingeni eliphezulu.
“Ngicabanga ukuthi udinga nje ukuqina, futhi uma sinquma ukumgcina, angasiza ngoba ungumdlali omuhle.”
