OweGuinea udube abezindaba, ingabe uzwa izigi zeBafana?
Umqeqeshi we-Guinea uPaulo Duarte akazange avele esithangamini sabezindaba esiyimqoqo ngoLwesihlanu.
Lokhu kwenzeke ngosuku olwandulela umdlalo obalulekile neBafana Bafana.
IGuinea izobhekana neBafana emdlalweni wokuhlungela i-Afcon ka-2027 ngoMgqibelo.
UDuarte uthe akaphilile, yingakho engakwazanga ukuya esithangamini.
Nokho, emahoreni ambalwa kamuva wabonakala engumqemane ngesikhathi elolonga iqembu lakhe.
Lokhu kuphakamise imibuzo ngokungabikho kwakhe kwabezindaba.
UJessie Kalalu, oyisikhulu sokuxhumana, uvele walibeka lomile iqiniso ngalesi simo.
“Asinaso isizathu esizwakalayo sokuthi umqeqeshi angabikhona lapha,” kusho uKalalu.
“Ubengafuni ukuza, kodwa ubefuna ukugxila emsebenzini wasenkundleni.”
UKalalu uthe uzamile ukuncenga uDuarte ukuthi avele esithangamini sabezindaba njengemfanelo.
“Ngizamile ukumnxenxa, kodwa ubengafuni ukuba khona,” kusho yena.
Esikhundleni sakhe, uthumele iphini lakhe lesithathu, uMamadouba Sylla.
Nokho, izintatheli zivele zamziba, zagxila kakhulu kubadlali baseGuinea kunaye.
UDuarte ubhekene nengcindezi enkulu ngaphambi kwalo mdlalo.
I-Guinea ayikaze iwine emidlalweni yayo emine edlule.
Iqembu liphinde laphuthelwa yi-Afcon yangonyaka odlule eMorocco.
Kodwa umdlali wasesiswini Mory Konate uthi ukungabikho kukaDuarte akuhlobene nengcindezi.
“Umqeqeshi ukhethe ukungabi khona,” kusho uKonate.
“Asicabangi ukuthi ubhekene nengcindezi.”
Uthe abadlali bakhuthazekile futhi bafuna ukuzibonakalisa uma sebebhekene neBafana.
Ukuthi bekuyisu noma ukugula, ukungabikhona kukaDuarte sekwengeze isinongo kulo mdlalo.
- FUNDA NALA | Okwenza uMosimane engatatazeliswa wukulinyalelwa
Manje wonke amehlo abheke ukuthi uzophendula kanjani enkundleni njengoba iBafana ifuna ukuqala kahle ekhaya ngokushaya i-Guinea yakhe.
- EZISHISAYO| Cofa lapha usithole kuWhatsApp
