Owayesebenza kwiChiefs uveza okwakhuba uLazarous Kambole
USinesipho Mali usefanise okwenziwa yiKaizer Chiefs kumgadli wayo wakudala uLazarous Kambole njengesifundo esikhulu ekuphathweni kwabadlali.
Le nsizwa eyayiyinhloli yekhono kuMakhosi iveze ukuthi ayibanga yinhle noma ngefanele indlela leli qembu alaphatha ngayo lo mgadli waseZambia.
Ekhuluma kwiSM Sports Consulting Symposium, uMali uphawule ngokwenza ukuthi uLazarous Kambole abhacaze ngesikhathi sakhe uNaturena.
Uthe into eyenza ahluleke ukwenza umsebenzi ayewusayinelwe wukuthi le kilabhu ayizange imsize ukuba azinze.
“Iqiniso ukuthi, njengekilabhu, asizange senze isimo esimvumela ukuba azinze,” kusho uMali.
Uvumile ukuthi indlela ayiyo uKambole nayo yaba nomthelela, kodwa wahlonza ukungensekwa ngokufanele ngengesithiyo esikhulu sempumelelo.
“Indlela ayiyo yenza kwaba nzima ukuthi azinze… Kodwa nawe uma ukhokha u-R10 million ngomdlali beseungamnaki.
“Kufana nokuthi uthenge iFerrari ngenhloso yokuyisebenzisa nsukuzonke kodwa bese ungayinakekeli ngendlela efanele,” kuqhuba yena.
ULazarous Kambole wafika kwiChiefs ethwelwe ngeqoma, kodwa wehluleka ukuqhubeka nomgqigqo owawenze yamlanda eZambia.
Le nkulumo kaMali ikhiphe ubuqiniso ngalo mdlali owagcina esesolwa ngokuthi ubezozidlela imali nje eNaturena.
