Okwenza uKhanye asole umqeqeshi ‘ngovalo’ kwi-Orlando Pirates
UJunior Khanye useveze akholwa wukuthi yisithiyo esikhulu esizokhuba i-Orlando Pirates emjahweni wesicoco seBetway Premiership.
Le nkakha ikholwa ukuthi abadlali bePirates bahlulwa yingcindezi yokuzihola phambili kwilogi.
AmaBhakabhaka adlale ngethuba lokuvula igebe ngesikhathi ebambana ngo 1-1 neSiwelele FC.
Lo mphumela wenze kwaba nephuzu elilodwa kuphela phakathi kwawo neMamelodi Sundowns esenomdlalo esandleni.
UKhanye uthi i-Orlando Pirates yiyo ebiphethe izigaba zokuqala zomdlalo nokuthi iqembu likaLehlohonolo Seema libe nenhlanhla yokungangenelwa yigoli esiwombeni sokuqala.
“Ngicabanga ukuthi uSeema ube nenhlanhla yokungangenelwa amagoli amabili emizuzwini yokuqala engu-35,” kusho uKhanye kwi-iDiski TV.
“Ukulingana ngamaphuzu neSundowns kudala inkinga ngokwengqondo kwabanye babadlali.
“U-Appollis uthole ithuba kodwa unozinti walivimba. Ishodi likaMbatha libuyele kuMoremi, kodwa angazi ukuthi kungani lo mfana eligejile ngesikhathi unozinti ephansi.
“NoRele (Mofokeng) naye uhlulwe yithuba elihle, wavele washaya into ephuma eceleni.”
UKhanye uphinde wangabaza ubuholi bomqeqeshi we-Orlando Pirates u-Abdeslam Ouaddou nezinqumo zakhe ngesiwombe sesibili.
“Uma wena njengomholi uqala ukwethuka, nakanjani nabadlali bakho nabo bazokwethuka,” kwengeza le nkakha.
Lo mhlaziyi uphinde wagqamisa akholelwa ukuthi umehluko omkhulu phakathi kwe-Orlando Pirates neSundowns emjahweni wesicoco.
FUNDA NALA | UMaboe uphawula ‘ngokungazwani’ kwiChiefs
“Ngithe umehluko ngumgadli. Lo mfana uBrayan León ungena ashaye igoli ngesikhathi lidingeka kakhulu.
“U-Iqraam Rayners ushaye igoli ngesonto eledlule, wabe esehlala ebhentshini ngaphandle kwencazelo.”
