Okushiwo uMofokeng ephawula okokuqala nge-St-Gilloise
Iqembu laseBelgium, iRoyale Union Saint-Gilloise, selimemezele ngokusemthethweni u-Relebohile Mofokeng njengomdlali walo omusha ngemuva kokumthenga kwi-Orlando Pirates.
Lo mdlali oneminyaka engu-21 usayine inkontileka yeminaka emine, ezomgcina kuleli qembu kuze kube maphakathi no-2030.
Le nkontileka iphinde inike iqembu ilungelo lokwelula le nkontileka ngomunye unyaka.
UMofokeng ufika eBelgium ngemuva kokugqama kwi-Orlando Pirates, lapho abe ngomunye wabadlali abahamba phambili.
Futhi usize iBucs yanqoba isicoco seBetway Premiership, iMTN8 neCarling Knockout ngesizini edlule.
Uphinde wadlala indima enkulu kwiBafana Bafana eNdebeni yoMhlaba ka-2026 ebise-US, Canada naseMexico.
Uqale imidlalo emibili, okubalwa nowomzuliswano ka-32 neCanada, lapho adlale khona ebhekene nozakwabo omusha, uPromise David.
Ekhuluma ngemuva kokusayina inkontileka yakhe, u-Relebohile Mofokeng uthe ujabule kakhulu ngokufeza iphupho lakhe.
“Ngijabule kakhulu ukuba lapha,” kusho lesi sihlabani esisakhula sikhuluma nabeqembu.
“Bekuyiphupho lami ukudlala e-Europe futhi ngibheke ngabomvu ukuqala umkhankaso wokuhlungela iChampions League,” kusho uMofokeng.
“Unyaka odlule ubungowokhethekile kimi. Nginqobe iligi ne-Orlando Pirates, ngadlala iNdebe yoMhlaba yami yokuqala neBafana Bafana, manje sengithathe elinye igxathu elikhulu emsebenzini wami.
“Ngiyethemba ukuthi ngizoqhubeka nokukhula njengomdlali lapha.
“Mina neqembu sizokwenza konke okusemandleni ethu ukulwela izicoco.”
- FUNDA NALA | ElaseBelgium lichoma ngoMofokeng
Abalandeli baseNingizimu Afrika bazobe bebheke ngabomvu ukubona ukuthi u-Relebohile Mofokeng uzoqhubeka yini nokugqama njengoba eqala impilo entsha kwelinye lamaligi aqinile ase-Europe.
- EZISHISAYO| Cofa lapha usithole kuWhatsApp
