Amathemba eBafana aselele kwiNigeria – izitha zayo ezinkulu
Uma i-Nigeria ingashaya iBenin emdlalweni wayo wokugcina wokuhlungela iNdebe yoMhlaba ka-2026 kungabe yenzele iBafana Bafana olukhulu ufefe.
Phela njengamanje ukungena kweBafana Bafana kulo mqhudelwano akusekho ezandleni zayo kuphela, kodwa ukulele nasemiphumeleni yeminye imidlalo.
Leli qembu likaHugo Broos lisendaweni yesibili kuGroup B ngamaphuzu angu-15, lisele ngamabili kwiBenin ngaphambi kwemidlalo yokugcina.
Kuzomele lishaye iRwanda ngembudlu yamagoli ngoLwesibili, bese lithemba ukuthi i-Nigeria neBenin bazodlala ngokulingana, noma kunqobe iSuper Eagles.
Uma kuqobe iBenin kulo mdlalo, kuyobe sekubhimbile kwiBafana Bafana njengoba amathuba ayo ayobe eselele ekutheni ube yiqembu elisebenze kangcono kwaqede endaweni yesibili emaqoqweni awo.
“Ibhola liyahlekisa kwesinye isikhathi,” kusho umhlaziyi uZipho Dlangalala ngalesi simo esesibhekene neBafana.
“Kuyamangaza ukuthi thina sesidinga iNigeria ukuze siyeeNdebeni yoMhlaba ngonyaka ozayo.
“Yebo ungizwe kahle impela, sidinga iNigeria le eyizitha zethu zangempela futhi ezinkulu.”
WINA | Ithuba lokuwina neVicks neLisenethini
Izinto zithande ukuqansa kakhulu kwiBafana ngemuva kokuhluleka ukushaya iZimbabwe ngoLwesihlanu ebusuku emdlalweni obuseThekwini.
Le midlalo yokugcina ezodlalwa ngoLwesibili izoqala ngesikhathi esifanayo njengoba izoqala ngo-6 ebusuku yonke.
FUNDA NALA | Isinameva futhi idinga umthandazo eyeBafana
INigeria yiyo ezobe isekhaya ibhekene neBenin, neBafana izokwwamukela iRwanda, kanti iLesotho izobhekana neZimbabwe ePolokwane.
