Ngathi sekuyasa ngolwe-Royal AM ‘esidayisiwe’ 

Abadlali be-Royal AM babuyele ejimini ngoLwesine ekuseni ngemuva kwezinyanga bengazi ikusasa labo nale kilabhu libhekephi. 

IPremier Soccer League (PSL) kulindeleke ukuthi iqinisekise ukuthi leli qembu selinabanikazi abasha kulandela isiphithiphithi esingcolise isithunzi sale nhlangano.

Leli qembu laKwaZulu-Natal lihlehliselwe imidlalo engu-13 kule sizini ngenxa yezinkinga zemali ebelibhekene nazo. 

Umdlalo wayo weNedbank Cup obekufanele babhekane kuwo neMilford FC nawo waqale wahlehliswa.

Kodwa wagcina uphiwe iMilford ukuze kuqhutshekwe nalo mqhulwano njengoba bekungaziwa kuzogcina kwenzakaleni nge-Royal AM. 

Manje iSABC Sport ibika ukuthi ngusomabhizinisi waseThekwini uthenge le kilabhu kwaSars ababeyifake endalini. 

Lokhu kwakulandela ukuthi benqobe impi yasenkantolo yokudla izimpahla zikaShauwn Mkhize ukuze baqoqe imali yentela abebakweleta yona. 

Kuvela ukuthi lo somabhizinisi oyitholile uhlule izimbangi eziqhamuka eMpumalanga, eFree State, eGauteng, naseDR Congo. 

Manje sekubhekwe ukuthi le kilabhu iqhubeke nokuzinza eKZN.

NgoLwesibili, abadlali bazisiwe ngokudayiswa kweqembu, base beyalelwa ukuthi baphndele ejimini ngoLwesine. 

I-PSL kulindeleke imemezela maduze imininingwane mayelana nemidlalo yayo esele.

• SIBAMBE NAKU-FACEBOOK | Lisenethini.co.za

Umthombo uveze ukuthi umnikazi omusha uthembise amabhonasi amakhulu kubadlali ukuze abagqugquzele ukwenza kahle kule midlalo ebasalele. 

Njengamanje i-Royal AM ihlezi emsileni kwilogi yeBetway Premiership ngamaphuzu ayisishiyagalombili kuphela emidlalweni engu-11.

Akukacaci noma leli qembu lizoqhubeka nokuhlala eMgungundlovu noma lizothuthela eThekwini. 

Umdlalo walo wokugcina bahlulwa ngo 3-1 yiTS Galaxy ngoDisemba 29. 

• BUKA | Unozinti waseKenya ehlazweni lokupheka imidlalo

Uma iPSL iyivumela ukubuyela enkundleni ukuqhubeka nemidlalo yayo izobhekana neMagesi FC ngo-Ephreli 5.