Lisenkingeni iqembu elisebenzise owokufika ongenamvume
Lingase lizithole lidliwa yizembe iqembu le-ABC Motsepe League elidlalise umdlali wokufika kuleli ongenawo amaphepha afanele.
IHighlands Park, eke yadlala ezigabeni zePSL, ingase ibhekane nokuphucwa amaphuzu angu-57 kwiSafa Gauteng ABC Motsepe League.
Lokhu kuza ngemuva kokuthi kutholakale ukuthi umgadli waseNigeria uFranklin Ogbonna ubesebenzisa amaphepha amvumela ukufunda nokusebenza kuleli awumgunyathi.
U-Ogbonna udlale imidlalo esebenzisa la maphepha omgunyathi, ngokubika kweFARPost.
UMnyango wezaseKhaya ukuqinisekisile ukuthi i-visa yokufunda kneyokusebenza awasebenzisile lo mgadli awekho emthethweni.
Incwadi efungelwe iveze ukuthi izinombolo ezikuma-visa akhe azikho kumarekhodi asemthethweni alo mnyango.
IHighlands Park iqede iqhwakele phezulu kwiGauteng ABC Motsepe League ngamaphuzu angu-83 ngemuva kwemidlalo engu-34.
Iqembu liwine imidlalo engu-26, ladlala ngokulingana kwemihlanu, lahlulwa kwemithathu.
Liqede lishiya iGomora United esendaweni yesibili ngamaphuzu ayisithupha.
Nokho u-Ogbonna udlale imidlalo la leli qembu liqoqe khona amaphuzu angu-57.
Uma iSafa iyiphuca lawo maphuzu, iHighlands Park izokwehla ifinyelele kumaphuzu angu-26 bese ihlala endaweni ka-18 kwilogi.
Lokhu kungabe sekusho ukuthi idliwa yizembe, ingabe isaya kweyokuhlunga eseBloemfontein.
Imidlalo yokuhlunga amaqembu azonyuselwa kwiMotsepe Foundation Championship ihlelelwe inyanga ezayo.
Ukudonswa kwamaphuzu okungenzeka kuzokwenza kube yiGomora United ethatha indawo yeHighlands Park, imele iGauteng kule midlalo.
Lesi sigameko sakamuva sengeza emlandweni wakamuva waleli qembu. Ngo-2020, iHighlands Park yathengisa isitifiketi sayo sePSL kwiTS Galaxy.
Lolu daba libeka iqembu leHighlands Park engcupheni kanti negama layo lizongcoliseka uma kugcina ngokuyibhedela.
Njengoba uMnyango wezaseKhaya uqinisekisa ukuthi amaphepha alo mgadli ngawomgunyathi, sekusele kwiSafa ukuthi iphume nesinqumo.
