Lihlehliswe yintengo elase-Algeria kowePirates

• Intatheli yeLISENETHINI

Iqembu lase-Algeria, iMC Alger, kubikwa ukuthi selidikilile eyokufuna uTshegofatso Mabasa we-Orlando Pirates. 

UMabasa, obengumshayi magoli ohamba phambili kwiPremiership ngesizini edlule, ubefunwa ngabomvu yileli qembu lase-Algeria. 

Nokho imibiko ephuma e-Algeria iveza ukuthi iMC Alger ihlehliswe yiPirates ngokufuna imali ebalelwa ku-R19.8 million ngalo mgadli. 

Akukhona okokuqala ikilabhu yase-Algeria ikhombisa intshisekelo ngoMabasa ; i-CR Belouizdad nayo ike yazama ukumsayinisa ezinyangeni ezimbalwa ezedlule kodwa yachithwa ngendlela efanayo.

Njengoba i-Orlando Pirates ilungiselela omunye umkhankaso kwiCaf Champions League, ukugcina uMabasa kubonakala kuyinto ehamba phambili.

Lo mgadli  ubambe iqhaza elikhulu ekutheni iPirates iqede isendaweni yesibili kwiPremiership ngesizini edlule ukuze ibuyele kulo mqhudelwano.  

IPirates seyivele idedele umgadli onamava uKermit Erasmus, indawo yakhe evalwe ngophuma enkulisa yayo uBoitumelo Radionpane. 

Lesi sinqumo sishiya uMabasa, u-Evidence Makgopa noZakhele Lepasa, njengabagadli abamqoka abanamava kumaBhakabhaka. 

OLUNYE UDABA: Isitobha siphawula ‘ngesiqalo esisha’ kwiChiefs

Ukugcina uMabasa kubukeka kubalulekile njengoba iPirates ihlose ukwenza ngcono ngesizini ezayo.