Isitobha siphawula ‘ngesiqalo esisha’ kwiChiefs
- Intatheli yeLISENETHINI
Umdlali omusha weKaizer Chiefs, u-Inacio Miguel, useveze imizwa yakhe ngalolu hambo olusha emsebenzini wakhe.
UMiguel ujoyine iChiefs esuka kwiPetro de Luanda yase-Angola abedlala kuyo noGilberto osekwi-Orlando Pirates.
Ungene kwi-Instagram wabhala umlayezo ngalesi sahluko esisha empilweni yakhe.
“Ngokuphazima kweso nje uyazi … Sekuyisikhathi sokuqala isigaba esisha bese wethembela emlingweni weziqalo ezintsha,” ubhale kanje.
UMiguel bekulindeleke ukuthi afike eNingizimu Afrika ngoLwesibili, kanti ukuhlolwa kwakhe kuhlelelwe uLwesithathu, ngokusho kwe-website yase-Angola i-Bola Em Campo.
Ukusayina kwakhe kubhekwe ngabomvu ngabalandeli beChiefs, abamagange ukubona ukuthi lo mdlali wasemuva oneminyaka engu-28 uliphatheleni iqembu.
UMiguel ubengomunye wezethenjwa kwiPetro de Luanda. Ubengumdlali ovelele kwiligi yase-Angolan, lapho egqame njengesitobha ezithembekile.
Ukufudukela kwakhe kwiKaizer Chiefs kuphawula igxathu elibalulekile emsebenzini wakhe, njengoba ebheke ukuveza isipiliyoni nethalente lakhe kwiBetway Premiership.
Abalandeli beChiefs bazobe bemagange ngokumenyezelwa kwakhe nokumbona edlala uma sekuphothulwe ukusayinwa kwakhe.
Uzoba nesikhathi esanele sokuzihlanganisa neqembu futhi ajwayele izindlela zikaNasreddine Nabi.
OLUNYE UDABA: Usejima kwelase-Argentina ‘ohambe isinyelela’ kwiDowns
Umdlalo wokuqala weChiefs kule sizini ungoSepthemba 14 lapho izovakashela khona iMarumo Gallants eBloemfontein.
