UMama Joy ugonyuluka ngokusala kwabaya kwiNdebe yoMhlaba
Umlandeli wezemidlalo odume kakhulu eNingizimu Afrika, u-Mama Joy Chauke useveze indumalo yakhe ngokuthi uzoyibuka kumabonakude i-World Cup kulokhu.
Lokhu kulandela ukuthi imizamo yakhe yokuthola abaxhasi abazomusa kulo mqhudelwano eMexico, Canada ne-US ingaphumelelanga.
Ubezifunela yena nje abaxhasi yingoba u-Mama Joy ugajiwe ohlwini lwabalandeli abaya kwi-World Cup kulokhu.
Unqgongqoshe wezemidlalo uGayton McKenzie uzamele abalandeli abangu-16 uxhaso lokuya eMexico.
UMama Joy obezwakala ukuthi ulimele emoyeni, uthi akaqondi kungani yena ekhishwa inyumbazane.
Ngesikhathi se-World Cup yebhola lombhoxo, le ntokazi yayihanjiswe umnyango wezemidlalo ukuya eFrance.
Kodwa uMcKenzie uthi umnyango wakhe ngeke ukhiphe imali engaka uhambisa abalandeli nje kuphela.
“Kubuhlungu ukuthi ungqongqoshe uthi ngeke angithathe ngoba kwachithwa u-R800 000 kimi ngingedwa.
“Kodwa kubalandeli abahambile kukhona esasihambe nayo futhi kwasetshenziswa imali efanayo,” kusho yena.
“Ngawalwela la mathuba. Sengichithe iminyaka ngiphephezelisa ifulegi laseNingizimu Afrika emhlabeni wonke.
“Kodwa manje sekumele ngibuke i-World Cup ngisekhaya kodwa abanye behambile.”
Yize kunjalo, u-Mama Joy usanethemba lokuthi kukhona uxhaso oluzovela ngemizuzu yokugcina, lumuse kwi-World Cup naye.
