‘Kuyazifikela’ kuMbekezeli Mbokazi ukudedela ishodi
Ingabe uMbekezeli Mbokazi uchitha isikhathi esingakanani ezilolongela ukukhahlelela ipali ekude?
Lona ngumbuzo ophonswe kulo mdlali weBafana Bafana gemuva kokushaya elihle igoli bebhekene nePanama ngoLwesibili ebusuku.
Yize leli goli lakhe alishaye engaphandle kwebhokisi libajabulisile abalandeli, umphumela awuzange ube muhle.
IBafana igcine ikhale ngaphansi ngo 2-1 kulo mdlalo obuseDHL Stadium eKapa.
“Kuyenzeka nje ngikhahlelele ipali noma sisejimini nje,” kusho uMbekezeli Mbokazi ngemuva komdlalo.
“Ngeke ngithi ngichitha isikhathi esiningi ngizilolonga kukho.
“Kodwa uma kungifikela, ngibona nethuba, ngiyathanda ukuthi ngikhahlele,” kuchaza lesi sitobha seChicago Fire.
UMbekezeli Mbokazi ubedlala okokuqala eNingizimu Afrika kusukela ejoyine leli qembu le-US Major League.
“Ngijabulile ukuba lapha nalaba badlali ekade ngagcina ukudlala nabo,” kusho yena ngokubuyela kwiBafana.
“Lokho kuyangikhuthaza ukuthi ngiqhubeke ngisebenze ngoba lisekhona ithuba lokuthi ngiqhubeke ngidlale nabo.”
Yize iBafana ikhale ngaphansi, uMbekezeli Mbokazi uthi umphumela ubasizile ukubakhumbuza ukuthi kusamele basebenze kanzima.
“Sidlale kahle kakhulu. Ukubambisana yikhona okusisizile lapha futhi ukuhlulwa akusho ukuthi sibhedile.
“Sisazoqhubeka silwe, sibambisane. Ukuhlulwa namuhla kuzosikhuthaza ukuthi silwele ukungaphinde sibe nesimo esinjena.”
Manje usebheke nokufaka umoya awuthole ngokudlala kwi-US Major League eqenjini leBafana.
“Ngokomuzwa engiwuthole ngokudlala ngale kule midlalo engisayidlalile, mhlawumbe uma ngingabuya nawo kukhona engingalekelela ngakho.
“Njengamanje ngeke ngkuhlonze ukuthi yikuphi, kodwa lokho engizokwenza engikufunde le mhlawumbe kungalekelela.”
