Kuyayilungela i-Orlando Pirates ngesicoco seligi kwizintwana
I-Orlando Pirates inwebe igebe ezihola ngalo esicongweni kwiDStv Diski Challenge ngemuva kokunqoba ngo 1-0 ihlula iStellenbosch FC eLentelus Sports Ground.
Ngemuva kwesiwombe sokuqala esingenagoli, uSimphiwe Masilela ushaye igoli elibewujuqu nelinikeze amaBhakabhaka amaphuzu amathathu.
Lo mphumela uwenze aphela ngamaphuzu ayisithupha kwiMamelodi Sundowns ebangisana nayo kulesi sicoco efuna ukusinqoba okokuqala.
Okuthatha amehlo wukuthi lamaqembu abambene ngobhongwane nasembangweni wesicoco emaqenjini amakhulu.
Lokhu kuwina kwe-Orlando Pirates kube yimpendulo eqinile ngemuva kokuhlulwa kwabo kwakamuva yiKaizer Chiefs.
Khonamanjalo, iChiefs iqhubekile nefomu yayo enhle inqoba ngo 2-1 kwiGolden Arrows eDobsonville Stadium.
Lo mphumela unyusele iChiefs – enqobe lesi sicoco okokuqala ngesizini edlule – endaweni yesine.
Igoli likaNaledi Hlongwane lisize Amakhosi inqobe okwesithathu kulandelana, kanti belilandela elokulinganisa likaSphenhle Mkhize.
Emdlalweni wezinkunzi zakwaKwaZulu, iRichards Bay iguqise AmaZulu FC ngo 2-1 eMpumalanga Stadium.
UKhaya Ndlangamandla ubeke iRichards Bay phambili ngaphambi kokuthi uBayanda Dlamini alinganise.
Kube sekuqhamuka u-Asimbonge Mdunge washaya igoli lokunqoba leNatal Rich Boyz.
Njengoba umjaho wesicoco usushuba, i-Orlando Pirates isalokhu izihola phambili futhi ibukeka isethubeni elihle lokudla isicoco.
Wonke amaqembu, ngaphandle kweSundonws nePolokwane City, asesele nemidlalo emihlanu kuphele isizini.
