UTruter ucacisa eyomdlali ambolekwe yiChiefs
- Alfred NGUBANE
USabelo Radebe, obolikiswe yiKaizer Chiefs kwiRichard Bay FC, sekusondele ukuthi aqale ukubonakala enkundleni.
Lokhu kuvezwe umqeqeshi weRich Boyz, uBrendon Truter ekhuluma nabezindaba kuleli sonto.
URadebe, ofike ekuqaleni kwesizini kwiRichards Bay, kuze kube manje ubengalitholi ithuba lokudlala.
“Kodwa ngiyambona ukuthi usebenza kanzima njalo ejimini,” kusho uTruter. “Uzobonakala kungekudala.”
“Usebenze kahle ejimini, futhi sekuseduze kakhulu ukuthi aqokelwe ukuqala umdlalo.
“Kodwa ngesikhathi esifanayo, uTlakusani Mthethwa noMoses Mthembu, abadlala indawo efanayo naye, basenza kahle.
“Ngakho-ke, kusele ukuthi kuvele ithuba bese simnika lona. Kumele alinde ngesineke ithuba lakhe, futhi lapho lifika kumele abe elilungele.”
Lo mdlali okhulele enkulisa yeChiefs unyuselewe eqenjini elikhulu eminyakeni embalwa edlule.
Nokho ukuthole kunzima ukungena eqenjini eliqala imidlalo yize enethalente elihle.
URadebe, oneminyaka engu-24 manje, wakhushulwa ngu-Arthur Zwane ngesikhathi engumqeqeshi kuleli qembu.
Ukhushulwe kanye nabadlali abanjengoMduduzi Tshabalala, noSamkelo Zwane. Laba bobabili kumanje bayingxenye yabadlali uNasreddine Nabi akhela phezu kwabo
Kubukeka uRadebe angase agcine ephelele kwiRichards Bay uma egcine ekwazile ukungena esikimini sikaTruter.
Ivele inkontileka yakhe kwiChiefs isiya emaphethelweni, kanti kubukeka emancane amathuba okuthi ivuselelwe.
