Kuvela umqeqeshi okunguyena owaponononga uThalente
- Sibongiseni GUMBI
Njengoba uThalente Mbatha esephenduke omunye wabadlali abaphambili kuleli, sekqubuke umbango ngokuthi ngubani owaponononga ithalente lakhe.
ILisenethini isanda kushicilela udaba lapho uProfessor Ngubane ethi nguyena owenza uMbatha lokho ayikho manje.
“UMbatha wadlala kwiMlungisi Professor Ngubane Academy ngaphambi kokuthi adlulele kwiSuperSport United,” kusho uNgubane.
“Ngaqala ukumbona efika ejimini elethwe ngomunye uthisha wakhe nomunye umfana angisabakhumbuli kahle amagama abo,” kuqhuba uNgubane.
Waphinde wapholofida ukuthi uMbatha uzobe edlala phesheya kungekudala ngoba ugumdlali oseqophelweni eliphezulu kakhulu.
Kodwa iLisenethini isithole olunye ulwazi ngokunguyena muntu okumele anconywe ngokuhlonza aphinde akhulise uMbatha.
Lowo nguThabani Zondo, ngokusho komqeqeshi onegama waKwaZulu-Natal, uZipho Dlangalala.
UZondo, oteketiswa ngelikaFish, wathola uMbatha eseneminyaka engu-14 kuphela eminyakeni engu-10 edlule.
“Abantu abaningi bathi yibo abakhulise uThalente Mbatha,” kusho uDlangalala.
“Nokho, umsebenzi wangempela wenziwa eminyakeni eyisithupha esohlelweni lokuthuthukisa abadlali abasebancane kwiDurban FC.
“Kwakungaphansi kukaThabani “Fish” Zondo, lapho uMbatha akhula khona njengomdlali.
“UZondo wambona ngo-2014 eseSastri College eThekwini. Ngaleso sikhathi uMbatha wayeneminyaka engu-14 kuphela.
“Ujoyine iqembu leDurban FC lika-Under 17 ngaphambi kokudlulela kwelika-Under 19.
“Waze wadlala eqenjini leDurban FC le-ABC Motsepe League,” kuqhuba uDlangalala owaziwa ngokungalali endleleni ngeqiniso.
Uphinde waveza ukuthi uhlelo olufanayo lokuthuthukisa abadlali lunabanye abanye abadlali abangu-12 asebedlala ezigabeni ezikhokhelayo zePSL.
“Kulolo hlelo lokukhulisa abadlali, kuphume abanye abadlali abangu-13, okuhlanganisa noMbatha, asebedlala kwiPSL.
“Ngemuva kweminyaka eyisithupha, ngo-2019, uMbatha wadlulela kwiHighlands Park lapho adlala khona kwiDDC (DStv Diski Challenge).
“Uhlale iminyaka emibili lapho ngaphambi kokujoyina iSupersport ngo-2021,” kwengeza uDlangalala.
Ngemuva kokunganakwa kwiSuperSport, izinhloli zePirates zabe seziyalela abaqeqeshi bayo ngalo mdlali.
Ujoyine iPirates ngokubolekiswa ngoJanuwari ukuze abaqeqeshi bambonele eduze.
Kodwa isizini iphele esengomunye wabadlali abadlala yonke imidlalo futhi wasayinwa ngokugcwele.
Nakule sizini ungomunye wabadlali abasayiqale futhi bayiqeda yonke imidlalo yePirates.
OLUNYE UDABA: URiveiro weneme, kodwa khona okungamgculisi ngeBucs
Kumanje kunamahlebezi okuthi iqembi elidlala kwiChampionship e-England, iCardiff City, lifuna ukumsayina.
