Kuvela okwenza uLamine Yamal agabhe iMorocco, aqoke iSpain
Umqeqeshi weMorocco uWalid Regragui usedalule ukuthi baze bazama ukunxenxa isihlabani esisesincane seFC Barcelona uLamine Yamal ukuthi azodlala kubo.
Lokho akuphumelelanga njengoba uLamine Yamal agcina edlala kwiSpain la asephenduke khona umdlali omqoka.
URegragui uveze ukuthi iMorocco yazama konke ukumnxenxa ukuthi ayijoyine besebenzisa i-Africa Cup of Nations neNdebe yoMhlaba ka-2030, okuzosingathwa yilelizwe lase-Afrika.
Baya kuLamine Yamal ngenhlonipho ejulile, bambekela uhlelo lwekusasa lakhe neMorocco.
“ULamine Yamal ungomuye wabadlali abasebancane esizamile ukusithola ukuze badlalele iMorocco.
“Kodwa wakhetha iSpain, futhi simfisela inhlanhla. Akwenzayo kule minyaka yakhe kuyamangalisa,” kusho uRegragui kwiMARCA.
Kubalulekile ukukhumbula ukuthi ngo-Agasti ka-2023, uYamal wathatha isinqumo esibalulekile sokumela iSpain esikhundleni seMorocco.
“Ngakhuluma ngqo noLamine Yamal futhi wayethembekile kimi nakwiMoroccan Federation,” kuqhuba uRegragui.
“Sizame konke ngohlelo lweMorocco, ne-Africa Cup of Nations ezweni lethu, ngeNdebe yoMhlaba ka-2030, ngothando izwe elinalo ngoLamine.
“Kodwa lengane ayizange iqambe amanga. Akazange alokhu eya le nale – wavele wakhetha iSpain.”
UYamal wazalelwa futhi wakhulela endaweni yaseRocafonda, eSpain, futhi ube yingxenye yebhola laseSpain isikhathi eside.
Ikhono lakhe licijwe kwiLa Masia Academy yeFC Barcelona kusukela esemncane.
“Ezinsukwini ezimbili noma ezintathu ngemva kokukhuluma naye, wangibiza ngenhlonipho…
“Wathi kimi, ‘Mnumzane, ngiyabonga ngomusa wakho, kodwa ngizokhetha iSpain. Uyingane eqotho kakhulu.
“Sakhuluma nomndeni wakhe, naye, nommeli wakhe. Kwaba yinto yokuqala engayenza ngifika kuleli qembu lesizwe.”
