Kuvela okufunwa yiChippa ngoNwabali ohalelwa elaseMorocco
IChippa United isibeke isamba sika-$600 000 (olinganiselwa ku-R10.5 million) engadedela ngawo unozinti wayo idabuka eNigeria uStanley Nwabali.
UStanley Nwabali kukholakala ukuthi usehehe intshisekelo yeziqhwaga zaseMorocco iRaja Casablanca.
Lo mdlali oneminyaka engu-29 ubudala ukhule kakhulu ngonyaka odlule, ikakhulukazi ngemuva kokudlala kwakhe kahle eqenjini lesizwe laseNigeria kwi-Africa Cup of Nations.
Lo nozinti onomzimba usize iSuper Eagles yafinyelela kowamanqamu lapho ihlulwe khona kabuhlungu ngosokhaya i-Ivory Coast.
Ikhono lakhe lokuvimba amabhola anzima nokukwazi ukuzikhululemela sekumenze waba ngomunye wonozinti abafunwa kakhulu ezwenikazi lase-Afrika.
IRaja Casablanca, ebheke ukuqinisa iqembu layo ngaphambi kwesizini entsha, kuthiwa ihlonze uStanley Nwabali njengonozinti ongabawusizo kuyo.
Nokho iChippa United ayihleki, okwenza kucace ukuthi lo nozinti ngeke ahambe ngemali encane.
Imithombo esondelene nezingxoxo ithi ukuxhumana kokuqala sekwenziwe, kodwa asikho isicelo esisemthethweni esesithuliwe okwamanje.
IChippa ikholwa wukuthi amava kaNwabali okudlala ezingeni lamazwe ngamazwe nelinye lamaqembu amakhulu ebholeni lase-Afrika kwenza afanelwe yile mali eyifunayo.
Nokho le mali esiyifuna manje seyehle kakhulu kunale usihlalo weqembu uSiviwe Mpengesi ayethe uyayifuna ngemuva kwe-Afcon.
Lesi sikhulu sasikubeke kwacaca ukuthi uma ezophuma kuleli, aye kwelinye izwe, uzodinga u-R40 million.
Kodwa njengoba kukholakala ukuthi usezongena kwisizini yakhe yokugcina ngokwenkontileka, iChippa isibheke ukudla ngaye ngaphambi kokuthi ahambe mahhala.
UNwabali, ojoyine iChippa ngo-2022, ube ngumdlali ovelele yize ikilabhu ilokhu iqeda maphakathi nendawo kwilogi.
Ukuhamba kwakhe kuzoshiya isikhala esikhuluepalini, kodwa kuvela ukuthi iChippa seyivele iqalile ukucinga omunye unozinti.
Njengoba intshisekelo yeRaja kulindeleke ukuthi ishube, kulindeleke kucace ukuthi uyahamba noma uyahlala lo nozinti emasontweni ambalwa ezayo.
Ukuthi iRaja izokwazi yini ukuhlangabezana nalokhu okufunwa yiChippa kusazobonakala — kodwa ngathi sekusele kuyo ukuthi yenza njani.
