Kuvela isizathu esenze i-Orlando Pirates idedele uNdah
Isishaqise abalandeli i-Orlando Pirates ngesikhathi imemezela ukuthi isidedele omunye umdlali wasemuva u-Olisa Ndah.
Lo mdlali omude bekubhekwe ukuthi abe ngomunye wabazovala isikhala sikaMbekezeli Mbokazi osanda kudayiselwa iChicago FC e-US.
Kodwa manje sekuthe ngoLwesine ekuseni i-Orlando Pirates yamemezela ukuthi seyimkhululile u-Olisa Ndah kwinkontileka yakhe.
Kukholakala ukuthi bese kuvele kusele izinyanga eziyisithupha kwinkontileka yakhe, ngakho kube sekuvunyelwana ukuthi asheshe ahambe.
Isizathu? I-Orlando Pirates ithi lokhu kwenziwe ngemuva kwesicelo sakhe u-Olisa Ndah sokuthi akhululwe.
Lokhu ukufunela ukuthi abe eqala efuna umsebenzi kwelinye iqembu la ezothola khona ukudlala njalo.
“Ikilabhu iyasihlonipha isifiso sikaNdah sokuthola isikhathi sokudlala esengeziwe,” kusho uPirates esitatimendeni.
“Siyakujabulela nokuba neqiniso kwakhe ekutheni akhulume nabaphathi bekilabhu ngezinhlelo zakhe.
“Kungalowo moya wokuhloniphana lapho kufinyelelwe khona kwisinqumo esinokuthula.
“Sithanda ukubonga u-Olisa ngobungcweti bakhe, ukuzinikela nokusebenza kwakhe ekilabhuni.”
Yize ikhono lakhe lingengatshazwe, ukulimala kukuphazamisile ukukhula kwakhe kwiBucs kule minyaka embalwa edlule.
Njengoba eseluleme ngemuva kokuhlala isikhathi esingaphezu konyaka engadlali, bekubhekwe ukuba abuyele eqenjini.
Lokhu ikakhulukazi ngemuva kokuhamba kukaMbokazi. Kodwa iPirates ibe seyisayina uMpho Chabatsane ukuvala lesi sikhala.
FUNDA NALA | IDurban City ixine iSundowns kabi ngomdlali emfunayo
Ngaphezu kukaChabatsane, kusekhona oTapelo Xoki, noThabiso Sesane kwabasalinde ukubuya eqenjini njengoba nabo kade belimele nje.
UNdah – oneminyaka engu-28 ubudala – ufike kwiPirates ngo-2021 kanti ubesedlale imidlalo engaphezu kuka-80 kuleli qembu.
