Kuvela isibalo samavoti adle iRoyal AM, abangavotanga
Sekuvele ukuthi kunmakilabhu amabili angazange avote ngesikhathi kuxoshwa iRoyal AM kwiPremier Soccer League (PSL).
Ibhodi elengamele i-PSL livotele ukuxosha iRoyal AM emhlanganweni okhethekile obungoLwesine eSandton Convention Centre eGoli.
Lesi sinqumo silandela isincomo seKomidi eliPhezulu lePSL sangesonto eledlule. Leli komidi lenze izincomo zokuthi ukuthi kuqedwe ngokushesha ubulungu beRoyal AM.
Manje ngokombiko we-IOL, amalungu angu-149 avote ngokuvumelana nalesi sincomo sokuxoshwa kweRoyal AM.
Abengu-37 kuphela aphikisane nalo mbono. I-Royal AM yona ayizange ivote kulo mhlangano.
Angu-31 esewonke amakilabhu abekhona — angu-15 aphuma esigabeni sePremiership nangu-16 aphuma kwiNational First Division.
Amaqembu ePremiership abenikwe amavoti angu-10 lilinye. Amaqembu eNFD wona abe namavoti amabili.
Amalungu ekomidi eliphezulu le-PSL wona anikezwe ivoti elilodwa ilungu ngalinye.
Amaqembu amabili eNFD kubikwa ukuthi awazange avote. Elinye lawo kuthiwa yiCape Town Spurs.
Izinkinga zeRoyal AM zaqala ezinyangeni ezedlule. Kusukela ngoNovemba, le kilabhu ibingaphansi komlawuli kaSars.
Lokhu kulandela isikweletu sentela sika-R40 million okubikwa ukuthi sikweletwa ngumnikazi wale kilabhu uShauwn Mkhize.
Leli qembu belisadlale imidlalo yeligi engu-11 kuphela kule sizini. Ukumiswa kwayo kudale ukuphazamiseka okukhulu kwiligi.
Njengoba iRoyal AM manje isixoshiwe, wonke amaphuzu atholwe kuyo kulindeleke ukuthi acishwe.
Leli qembu liphinde lamiswa kwiNedbank Cup ngasekuqaleni kwalo nyaka.
Ukuxoshwa kwalo kwehlise isibalo samaqembu ePremiership aba ngu-15. I-PSL manje isizophinde ihlangane ukuze inqume ngokuthi izembe lizosebenza kanjani.
Le nhlangano ibingakasenzi isimemezelo esisemthethweni ngalolu daba lweRoyal AM, kodwa imithombo eminingi ikuqinisekisile ukuxoshwa kwayo.
