Kungani uKaze ebeyedwa ebhentshini leChiefs? Uyachaza
Umqeqeshi weKaizer Chiefs, uCedric Kaze, usedalule isizathu esenze engabonakali uzakwabo uKhalil Ben Youssef ebhentshini ngesikhathi bebhekene neSiwelele FC.
Amakhosi adlale ngokulingana ngo 0-0 neSiwelele emdlalweni weBetway Premiership eFNB Stadium.
Ngaphezu kokulawula umdlalo, leli qembu laseNaturena lihlulekile wukwakha amathuba acacile.
Ngaphezu kwalokho, abalandeli basale bedidekile ngemuva kokuthi omunye wabaqeqeshi engabonakalanga enkundleni.
UCedric Kaze ubehlezi yedwa ebhentshini, futhi nasohlwini lweqembu bekubhalwe yena yedwa njengomqeqeshi.
Lokhu kususe isasasa nokuqagela, kodwa uKaze usesivezile isizathu sokuthi kungani ebewabambe yedwa amatomu kulo mdlalo.
“UKhalil ubehambele udaba olubhekene naye ekhaya eMorocco,” kusho uKaze ngemuva komdlalo.
“Ubengekho lapha, kodwa uzobuya kusasa (ngoLwesine).”
Ukubuyela emdlalweni, bese kungokwesine leli qembu lihluleka ukunqoba emidlalweni yeligi.
Lo mphumela ulishiye endaweni yesine kwilogi, lisele ngamaphuzu amahlanu kwiMamelodi Sundowns ezihola phambili kulo mjaho.
UKaze ukhale ngokungakwazi kweqembu lakhe ukusebenzisa ukuphatha kwalo ibhola libhekene noSiwele.
Uthembise ukuthi bazoqinisa ekusebenzeni ekutheni bakwazi ukwakha amathuba amaningi nokushaya amagoli.
FUNDA NALA | IPirates ibuyele emgqigqweni wokunqoba
Ukubuya kukaBen Youssef kulindeleke ukuthi kukhuphule umfuthi ngaphambi komdlalo obalulekile weCaf Confederation Cup ngempelasonto.
