Kumshubele uRiveiro i-Al Ahly ithola induku
Ngokushintsha kwesimo sezulu okumangalisayo eMetLife Stadium, iPalmeiras ihole i-Al Ahly 2–0 ngaphambi kokuthi umdlalo umiswe.
Lokhu bekungenxa yesimo sezulu esingesihle njengoba beliduma futhi lisabisa ngombani omubi.
Umdlalo umiswe ngomzuzu ka-62, abalandeli banxuswa ukuthi baphume enkundleni bayofuna indawo yokukhosela.
Abadlali nabo bayalelwe ukuthi babuyele ezindlini zabo zokushintshela njengendlela yokuzivikela.
Amaphuzu avelele kulo mdlalo kube yilawa:
- Umzuzu ka-39: URaphael Veiga wePalmeiras ukhishwe ngekhadi elibomvu, kodwa leli khadi labuye lahoxiswa ngemuva kokuhlolwa kwesigameko nge-VAR.
- Umzuzu ka-49: UWessam Abou Ali ushaye igoli elibe umkhonto odla ekhaya elibeke iPalmeiras phambili.
- Umzuzu ka-59, uFlaco López waphinda wengeze igoli lesibili elenze kwaba ngu 2-0, kwaqansa kakhulu kwi-Al Ahly.
Ukubambezeleka komdlalo kuthathe cishe imizuzu ebalelwa kwengu-48 ngaphambi kokuthi umdlalo ubuyele enkundleni.
Lokhu kuphazamiseka kuphawula ukuphazamiseka kwesibili kwemidlalo ngenxa yesimo sezulu esingesihle kulo mqhudelwano.
Umdlalo weMamelodi Sundowns ne-Ulsan HD noweRB Salzburg nePhacuta nayo ibambezelekile ngenxa yesimo sezulu esingesihle.
Ngemuva kwekhefu elide, ukubusa kwezaseBrazil kuqhubekile njengoba iPalmeiras igcine ukulawula kwayo ibhola ebikwenza ngaphambi kokuphazamiseka.
Khonamanjalo i-Al Ahly ithwale kanzima ukwakha amathuba acacile — futhi yagcina ihlulwe ngendlela embi.
Amathuba ayo manje okungena esigabeni somkhumulajezi asemancane kakhulu.
- JOYINA | SineGroup kaWhatsApp, cofa la
Nengcindezi kumqeqeshi omusha uJose Riveiro nayo izokhula njengoba ezinye zezingwazi zeqembu sezivele zike zazwakalisa ukungeneliseki ngokuqokwa kwakhe.
