Kube umbukiso kaTorres i-PSG igugisa iSlovan

I-PSG ivule umkhankaso wayo wokuvikela isicoco se-Uefa Champions League ngokushaya iSlovan Bratislava ngo-6-1.

ILiverpool yona ibuye kade seyilandela ngemuva ihlula i-Atlético Madrid ngo-2-1 e-Anfield.

UFerran Torres uphawule ukuqala kwakhe imidlalo yeChampions League egqoke ijezi leParis Saint-Germain ngamagoli amathathungenkathi labo mpetha abavikela isicoco bebhubhisa iqembu likaYaya Touré e-Parc des Princes.

U-Ousmane Dembélé ushaye amagoli amabili emizuzwini eyisithupha yokuqala yomdlalo.

Elokuqala libe lula njengoba eqedele ibhola ebelizishayise epalini kade uNuno Mendes eseqedile ngonozinti. 

UTorres ube eseqhubeka nomsebenzi ngomzuzu ka-30, waphinda elesibili zibuya nje ekhefini. Uqedele amagoli akhe amathathu ngomzuzu ka-57.  

USuleiman Camara uzamile ukubuyisa iSlovan, kodwa uFabián Ruiz waqinisekisa ukuthi umphumela muhle kwiPSG.

Umqeqeshi we-PSG uLuis Enrique akazange ayithambisele iSlovan njengoba ebophele iqembu elinamandla elinabadlali abaqokelwe kwi-Ballon d’Or.

Nokho isivivinyo esikhulu sePSG kulo mqhudelwano siseza njengoba isazobhekana neManchester City neBarcelona emidlalweni ezayo.

E-Anfield, i-Atlético isheshe yazibeka phambili ngomzuzu ka-17 ngenkathi uJulián Álvarez ephasela uMarcos Llorente elihle ibhola.

ULlorente akazange esacucuza, walikha qede lameqa u-Alisson, layokhalakathela enethini.

• FUNDA NALA | ISundowns isiluqalile utalagu kwiBetway Prem

ILiverpool ilinganise ngaphambi kwekhefu ngoDominik Szoboszlai emva kokuphaselwa ngesithende nguRonald Araújo.

U-Alexis Mac Allister emva kwalokho unamathisele igoli lokunqoba, ededela ishodi engaphandle kwebhokisi emizuzwini emihlanu kuqale isiwombe sesibili. 

Imiphumela egcwele yangoLwesithathu: FC Barcelona 5–1 Feyenoord; VfB Stuttgart 3–1 Viking; Napoli 0–1 Arsenal; Liverpool 2–1 Atlético Madrid; PSG 6–1 ŠK Slovan Bratislava; Sporting CP 3–1 Galatasaray

• EZISHISAYO| Cofa lapha usithole kuWhatsApp