ISundowns iphenduke utalagu ibhaxabula iSiwelele
IMamelodi Sundowns ishaye iSiwelele FC ngo-3-0 eLoftus Stadium ngoLwesithathu ebusuku ukuze ivule igebe lamaphuzu ayisithupha phezulu kwilogi yeBetway Premiership.
AmaBrazilians akhombise zisuka ukuthi ayawafuna amaphuzu, kodwa iSiwelele yadaza inkani kwaze kwayiwa ekhefini zibambene ngo-0-0.
Unozinti obedlala umdlalo wakhe wokuqala kwiSiwelele, uWandile Mthombeni uvimbe amabhola amabi abethunyelwa yiSundowns.
Nokho izinto zijikile ngomzuzu ka-58 ngesikhathi uKutlwano Letlhaku ebhakuzisa inethi eseyedwa ebhokisini leSiwelele.
USiyanda Ndlovu, obengene esuka ebhentshini, ushaye elesibili ngomzuzu ka-79 ngaphambi kokuba aphakele omunye abasuke naye ebhentshini uTashreeq Matthews ukuba ashaye elesithathu.
Umphumela ugcina irekhodi leMamelodi Sundowns lokungehlulwa kule sizini kwilogi.
Manje ihlezi phezulu ngamaphuzu angu-19 emva kwemidlalo eyisithupha, lapho inqobe emihlanu, yadlala ngokulingana kowodwa.
ISiwelele yona ayikanqobi kule sizini, kanti isadlale ngokulingana kabili, yahlulwa kane emidlalweni eyisithupha.
- FUNDA NALA | UBartlett uthi uyivakasha uRele eBelgium
UGodfrey Mosoetsa ubesebhentshini okokuqala kwiSiwelele emva kokuba kuxoshwe uLehlohonolo Seema nephini lakhe uWillem Jackson ekuqaleni kwaleli sonto.
- EZISHISAYO|Â Cofa lapha usithole kuWhatsApp
