Ithuba lokusula izinyembezi kwiChiefs neDowns ngeCarling KO
I-Kaizer Chiefs neMamelodi Sundowns bazozama ukuvuka bazithathe uma sebeqala imikhankaso yabo yeCarling Knockout Cup ngoLwesibili.
La maqembu amabili amakhulu aseNingizimu Afrika angena kule midlalo enezilonda ezibhibhayi kulandela ukukhishwa emiqhudelwaneni yeCAF.
Abhekene nengcindezi enkulu yokuthi aphendule enkundleni, asule abalandeli bawo izinyembezi ngemiphumela emihle.
IChiefs kaFernando Da Cruz izokwamukela iTS Galaxy eFNB Stadium. Nokho, iGalaxy isike yaba yinkinga kuMakhosi emidlalweni yakamuva.
I-Kaizer Chiefs ikhishwe yiRed Arrows yaseZambia kwiConfederation Cup, iyihlula sekukhahlelwa ngamaphenathi.
Ukungabaza ngekusasa likaDa Cruz kuyanda, kanti ukuhluleka ukunqoba kungakhuphula ingcindezi ngaphambi komdlalo weSoweto Derby.
ISundowns yona izobhekana neMarumo Gallants eLoftus Stadium. AmaBrazilians ashaqise abalandeli ngokukhishwa yiWiliete SC yase-Angola kwiChampions League.
Amaqembu abambane ngo 1-1 ePitoli ngoLwesihlanu, kwase kunquma amagoli asekuhambeni.
Umqeqeshi uMiguel Cardoso uchaze lo mphumela njengobusuku obumnyama, wathembisa ukuthi iqembu lizovuka lizithathe.
Ngakolunye uhlangothi, i-Orlando Pirates isesimweni esihle ngemuva kokunqoba i-African Stars ngo 5-0 sekuhlanganiswe imilenze yomibili.
- FUNDA NALA | Libongwe ngemoto isosha eligile iChiefs
Yona izokwamukela iMilford FC e-Orlando Amstel Arena ngawo uLwesibili kanti kubhekwe iqhubeke nomgqigqo wayo omuhle.
Nokho okubaluleke kakhulu wukuthi iCarling Knockout isiyithuba lokuthi i-Kaizer Chiefs neSundowns baziphendulele.
- EZISHISAYO!|Â Cofa lapha usithole kuWhatsApp
