Abalandeli baduduza oweBanyana ozisola ngokuyeka ‘imbuzi’
Umgadli weBanyana Banyana uJermaine Seoposenwe usezwakalise ukuzisola ngemuva kokushweba ithuba elilula emdlalweni wabo wokuqala kwiCaf Women’s Africa Cup of Nations eMorroco.
Ngesikhathi iBanyana Banyana seyihamba phambili ngo 2-0, uSeoposenwe uphume uqekelele, wabhekana nonozinti weGhana.
Nokho ibhola lakhe livele laphuma eceleni kwepali, kanti ukube ulinamathisele enethini belizoyikhathaza liyiqede iGhana.
Ngemuva komdlalo, lesi sethenjwa eqenjini likaDesiree Ellis singene kwi-X sabalisa ngaleli thuba esihlulekile ukulisebenzisa kahle.
Ufake ividiyo yaleli thuba, wabe eseyiphelezela ngombhalo othi: “Leli lizongidla ngaphakathi. Bekufanele ngabe…”.
Le vidiyo, eyisiqeshana semizuzwana engu-23 siveza lesi sihlabani sithola le mbuzi yethuba kodwa sihluleka wukushaya igoli salo lesibili kulo mdlalo.
Yize yena ezisola ngaleli thuba, kodwa alizange likhaleleke kangako njengoba iBanyana Banyana idlule ngo 2-0 kulo mdlalo wayo wokuqala kaGroup C.
Abalandeli abaningi bakhombise ukuzwelana naye futhi bameseka, bemtshela ukuthi usazowathihliza amanye amagoli akangazisoli ngaleli.
U-@Gretchen_Ndou uthe: “Funda emaphutheni akho futhi ngokuzayo uzokwenza kangcono.”
U-@FKolobe_Malepe yena uthe: “Ngempela bekufanele wenze kangcono. Kodwa kusazokwenzeka ngokuzayo. Qina.”
U-@kayEasy_ uthe: “Ungaligebisi ikhanda lakho ngalokhu. Siyakholelwa kuwe thina.”
Yini elandelayo?
Abalandeli bazobe bebheke ukuthi uSeoposenwe avuke azithathe futhi athwale leli qembu okubhekw elivikele le ndebe eliyinqobe ngo-2022
Ngabe lokhu kuzomfaka umfuthi wokuqhubekela phambili ngamandla, noma kuzokwehlisa ukuzethemba kwakhe?
