Isililo ebholeni laseMzansi kushona abalandeli abaqavile

Umphakathi webhola laseNingizimu Afrika ushaqekile kulandela ukudlula kabuhlungu emhlabeni kwabalandeli abathathu abaqavile futhi abebenothando lwebhola. 

Sekusabalele imibiko ezinkundleni zokuxhumana yokuthi uNkosinathi “Gubevu ZN” Kufa, uNtokozo “Mapensela” Manyama, noBhubesi bashone engozini yemoto. 

Laba bobathathu kukholakala ukuthi bafe ngemuva kokuba sengozini ahlanganisa izimoto ezintathu phakathi kweMtamvuna Bridge nePort Edward.

Imininingwane egcwele ngokuthi le ngozi yenzeke nini beyingakaveli kodwa kuvela ukuthi bebesuka e-Eastern Cape bebuyela eThekwini ngesikhathi kwenzeka le ngozi.

Kuthiwa bebekade besuka e-Eastern Cape lapho kade beyobuka khona idabhi yaseBizana ye-ABC Motsepe League.

UGubevu ZN obengumlandeli webhola onentshisekelo enkulu, ubaziwa kakhulu ngothando lwakhe lweKaizer Chiefs neSinenkani FC. 

Ukuzikhuluma kwakhe ngokungagwegwesi nokuzinikela kwakhe kulo mdlalo kumenze wahlonishwa ezweni lonke.

UMapensela yena ubengumthwebuli wezithombe zemidlalo yebhola onekhono. 

Izithombe zakhe beziveza umuzwa wabalandeli ngokunjalo nemizwa yabadlali ngendlela emangalisayo. 

Umsebenzi wakhe ubusondeza abalandeli kulo mdlalo, ekhombisa imizwa nezikhathi ezibalulekile zebhola.

UBhubesi yena uchazwe ngokuthi ubengomuntu wabantu futhi enogazi emphakathini webhola, eletha amandla nomdlandla kulo mdlalo. 

Ukuba khona kwakhe eceleni nothando lwakhe ngalo mdlalo kumenze waduma kubalandeli.

Ukudlula kwabo emhlabeni kuwukulahlekelwa okukhulu ebholeni laseNingizimu Afrika. 

• FUNDA NALA | Liyakhula isasasa, uMcCarthy uthembisa lukhulu eKenya

Kwangathi imiphefumulo yabo ingaphumula ngokuthula. ILisetheni idlulisa amazwi enduduzo emindenini, abangani nozakwabo.