Isihlabani sePirates u-Appollis siphawula ngeyezindondo 

U-Oswin Appollis usebe nomthelela ophawuleka kakhulu kwi-Orlando Pirates kangangokuthi usebalwa kwabangase baklonyeliswe ngezindondo ezinkulu zePSL.

Ubalulwa kwezimbili ezinkulu kule miklomelo – eyePlayer of the Season neyeFootballer of the Season.

Lo mdlali oneminyaka engu-24 ubudala ujoyine iPirates ekuqaleni kwesizini, kodwa useyilungu elibalulekile leqembu lika-Abdeslam Ouaddou. 

U-Oswin Appollis ufake isandla kakhulu kuleli qembu elisiza ukunqoba iMTN8, uphinde wasiza ukuthi i-Orlando Pirates ifinyelele kowamanqamu kwiCarling Knockout. 

Kodwa, ekhuluma nabezindaba ngaphambi kwalo mdlalo wamanqamu okule mpelasonto, uthe yena akabhekile udumo lwakhe ngayedwana.

“Umsebenzi wami kuhlezi kuwukusiza iqembu,” kusho u-Appollis lapho ebuzwa ngenkulumompikiswano ekhona ngemiklomelo.

“Ngisho ukushaya amagoli, kungenye yezinto engingazigxili kuzo. 

“Umsebenzi wami mina ukwenza kahle ukuze ngisize iqembu ukuthi linqobe futhi yilokho engigxile kukho.”

Uzoba ngomunye wabadlali abalandeli bePirates abazobe bethembele kubo ukusiza iqembu labo ukuthi linqobe indebe yalo yesibili kule sizini. 

FUNDA NALA | Okwenza uCardoso engamsoli uWilliams ngephutha

Ngemuva kowamanqamu, uzobe esegxila eqenjini lesizwe lapho ephinde abe ngomunye wabadlali abayizethenjwa zikaHugo Broos. 

ZITHOLE ZISHISA: Cofa lapha usithole kwiWhatsApp Channel yethu