IPyramids isiqinisekise uRulani Mokwena njengomqeqeshi omusha
Iqembu lase-Egypt, iPyramids FC, selimemezele ngokusemthethweni ukuqoka umqeqeshi waseNingizimu Afrika u-Rulani Mokwena njengomqeqeshi walo omusha ngaphambi kokuqala kwesizini ka-2026/27.
Leli qembu, elibe ngompetha beCaf Champions League kumasizini amabili edlule, lamukele uMokwena ngomlayezo omfushane othi: “Siyakwamukela ekhaya lakho elisha.”
UMokwena uthatha izintambo kuKrunoslav Jurčić waseCroatia, oshiye umlando ngokunqobisa iPyramids iCaf Champions League nokuqeda endaweni yesibili kulandelana kwiligi yase-Egypt.
Ukuqokwa kwakhe kuza ngemuva kwezinsuku ezimbalwa esule esikhundleni kwi-Al Ittihad yaseLibya.
Nakuba abaphathi balelo qembu kuthiwa bazamile ukumncenga ukuthi ahlale, wagcizelela ukuthi isinqumo sakhe besingeke sishintshe.
Kubikwa ukuthi u-Rulani Mokwena wakhungatheka ngenxa yezithembiso ezenziwa ngaphambi kokusayina kwakhe inkontileka ezingagcinwanga.
Wayetshelwe ukuthi iqembu lizoletha abadlali abasezingeni ukuze lilwele isicoco seligi yaseLibya nokungena kwiCaf Champions League.
Nokho, abadlali ayebafuna okubalwa kubo uFiston Mayele, uJean-Claude Girumugisha noFeisal Salum bagcina bengasayiniwe, bathathwa yizimbangi i-Al Ahli Tripoli.
UMokwena wayekholwa ukuthi iqembu elifuna ukubusa ekhaya nase-Afrika kumele liqale ngokusayinisa abadlali abahamba phambili ezweni lalo, njengoba kwenza amaqembu afana ne-Al Ahly neMamelodi Sundowns.
Yize i-Al Ittihad yazama okokugcina ukumvimba ukuthi ahambe, uMokwena waqhubeka nesinqumo sakhe.
- FUNDA NALA | OweMilford uphawula ngokuqala ngePirates
Manje usezohola iPyramids FC emkhankasweni wayo wokulwela isicoco seCaf Champions League, neligi yase-Egypt nokwakha iqembu elizokwenza kahle kwiFifa Club World Cup ka-2029.
Ngaphambi kokuphothula lesi sivumelwano, u-Rulani Mokwena ubesechithe izinsuku ezimbalwa eseholidini elifishane eTanzania ngaphambi kokundizela e-Egypt ukuyoqala impilo yakhe entsha kwiPyramids FC.
- EZISHISAYO| Cofa lapha usithole kuWhatsApp
