IPirates neCT City embangweni wesihlabani se-Azam
Iziqhwaga zeBetway Premiership i-Orlando Pirates neCape Town City kubikwa ukuthi basembangweni oshubile wokusayina umdlali wasesiswini we-Azam FC.
Lo mdlali okuthiwa unekhono elihle, uGibril Sillah, uzoshiya le kilabhu yaseTanzania uma kuphela le nyanga.
Lo mdlali oneminyaka engu-26 ubudala waseGambia unqabile ukwelula inkontileka ngeminyaka emibili kwi-Azam FC.
Lokhu kusho ukuthi uzokhululeka uma kuphela inkontileka yakhe uma kusongwa uJuni.
USillah ubengomunye wabadlali abenze kahle ngesizini 2024/25, la eshaye khona amagoli ayisishiyagalolunye kwiligi emidlalweni engu-20.
Ngokwemibiko, i-Orlando Pirates izimisele ngokuthola uSillah njengoba ilindele ukuthi ingase ishiywe uRelebohile Mofokeng okubhekwe aye e-Europe.
Khonamanjalo, iCape Town City nayo inentshisekelo kulo mdlali, yize njengamanje isesempini yokuvika izembe.
Leli qembu lidlala kweyokuhlunga namaqembu amabili asuka kwiMotsepe Foundation Championship kumanje kulandela ukuqeda endaweni ka-15 kwilogi.
Ngale kwamaqembu aseNingizimu Afrika, kuthiwa kukhona awase-Algeria, e-Egypt, eMorocco, nakhona neTanzania asiqaphe ngelokhozi isimo sikaSillah.
ISimba SC, eqeqeshwa nguFadlu Davids wakuleli, kubikwa ukuthi nayo inentshisekelo ngemuva kokuphuthelwa yilo mdlali ngo-2023.
Imibiko yakamuva iphakamisa ukuthi i-ES Setif okwamanje isike yazama ukuheha uSillah, kodwa wayichitha ngoba esalindele okungcono.
Njengoba amakilabhu amaningi ezibhekile kule, umbango wokusayina uSillah usalokhu uvulekile.
