IPirates isihubha utalagu, kodwa iSundowns ngeke ixegise
Umqeqeshi weMamelodi Sundowns uMiguel Cardoso uthi umjaho wesicoco seBetway Premiership awukapheli.
Lokhu ukusho yize iMamelodi Sundowns isivule igebe elihle ngemuva kokuthi i-Orlando Pirates ilahle amaphuzu ngoLwesithathu ebusuku.
AMasandawana inqobe ngo 3-0 ehlula iRichards Bay, kwathi amaBhakabhaka ahlulwa esekhaya yiSekhukhune United ngo 1-0.
Le miphumela yenze iMamelodi Sundowns yavula igebe lamaphuzu angu-12 eshiya ngalo i-Orlando Pirates, esenemidlalo emibili esandleni.
Ngesikhathi uCardoso etshelwa ngomphumela wezimbangi zakhe, uvele wamangala.
Kodwa ugcizelele ukuthi iqembu lakhe lisadinga ukubheka umsebenzi walo kuphela.
“Ngimangele impela, uyezwa nwe kuleli zwi, ngoba bengingazi,” usho kanje ngesikhathi etshelwa ngomphumela wePirates.
“Ngokusobala kuzoncika kithi. Kusenemidlalo emihlanu okufanele siyidlale.
“Impela izimbangi zethu ngeke ziphele amandla futhi sidinga ukuqhubeka sigaye amaphuzu…
“Ngokusobala uma singakhulisa igebe, kusinika isikhala sokukhululeka.
“Kodwa akususi lutho endleleni okufanele senze ngayo. Sinemidlalo emihlanu enzima okufanele siyidlale.
“Olandelayo ule eKapa, kanti iCape Tiwn City yiqembu elisempini yalo futhi elinezinjongo zalo.
“Kufanele sizihloniphe, kufanele sihloniphe nembangi… – singajabuleli esesikwenzile bese siyalala.
“Sidlale omunye umdlalo namuhla, futhi sineminye imidlalo emihlanu okufanele sibhekane nayo.
“Uma sithole ukuba negebe elengeziwe, kuhle, kodwa yinto okufanele sikwazi ukuyiphatha, ingasixhophi.
“Impi isaqhubeka, sidinga ukunqoba imidlalo yethu,” kuqhuba uCardoso.
UCardoso uthe yize iMamelodi Sundowns inegebe elikhulu, ngeke abaphumuze abadlali.
“Ngeke ngibaphumuze abadlali bami. Kudingeka baqhubeke bazikhandle.
“Lo mqhudelwano unzima, kusekuningi okusamele kwenziwe phambili.
“Emasontweni ayisithupha ezayo, sinemidlalo emihlanu esele.
“Siyazi ukuthi kuzoba nzima, kodwa sigqugquzelekile, futhi sijabule.
“Siyawazi umthwalo esiwuphethe, nezinga lezimbangi zethu futhi siyabahlonipha.
“Ukuze sibahloniphe sidinga ukwenza umsebenzi wethu, siqine, siqhubeke nokuzicija, siqhubeke sisebenza futhi kuze kube sekupheleni.
“Kukuleso simo sengqondo kuphela lapho singaba ngamaqhawe. Kuningi okumele kwenziwe.”
