IPirates eqoqweni elinzima eline-Al Ahly 

• Intatheli yeLISENETHINI

Iqhathwe eqoqweni elithanda ukusinda i-Orlando Pirates kwiCaf Champions League njengoba ikwelilodwa nompetha i-Al Ahly.

Ukuqhathwa kwamaqembu azodlala kulesi sigaba kwenziwe ngoMsombuluko ekomkhulu leCaf, eCairo, e-Egypt. 

IPirates ingene kuGroup C, kwathi iMamelodi Sundowns yaqhathwa kuGroup B kulo mqhudelwano ongomkhulukazi ebholeni lamaqembu ezwenikazi. 

ISundowns izobhekana nezinkunzi zaseMorocco, i-AS FAR neRaja Casablanca nelaseDR Congo, i-AS Maniema kulesi sigaba. 

I-AS FAR beyiqeqeshwa uNasreddine Nabi lo osekwiKaizer Chiefs manje, kanti kwiRaja bekukhona uJosef Zinnbauer noFadlu Davids abake basebenza kwiPirates. 

IBucs yona izodudula ne-Al Ahly, iCR Belouzdad yase-Algeria neStade d’Abidjan yase-Ivory Coast. 

Izobhekana nabadlali bakuleli ebazi kahle oPercy Tau okwi-Al Ahly noKhanyiso Mayo okwiCR Belouzdad. 

IStellenbosch FC, emele elakuleli kwiConfederation Cup, iqhathwe kuGroup B kulo mqhudelwano. 

• OLUNYE UDABA: Uyoyishaya kowe-Afcon unompempe ‘ogile’ iStellies

Izodudulana neRS Berkane yaseMorocco, Stade Malien yaseMali neCD Lunda Sol yase-Angola, ewashise iSekhukhune United ijezi kweyokuhlunga.