Ingwazi yeChiefs ikhathazekile ngomthelela kaMfundo Vilakazi
Inkakha yeKaizer Chiefs uDoctor Khumalo isinxuse ithimba labaqeqeshi lale kilabhu ukuthi like liphinde libhekisise indlela elidlalisa ngayo uMfundo Vilakazi.
Ekhuluma kwiSoccer Zone, lapho manje esengumhlaziyi, uDoctor Khumalo uphakamise imibuzo ngendlela uMfundo Vilakazi asetshenziswa ngayo.
Ubekhuluma ngomthelela walo mdlali oneminyaka engu-20 ubudala osuke ebhentshini wenza umehluko yize iChiefs igcine ihlulwa ngo 2-1 yi-Al Masry kwiCaf Confederation Cup.
“Uma ufuna ukukhuluma ngoMfundo, bheka iminyaka yakhe edlule kwiKaizer Chiefs uma kuqhathaniswa naleyo ayiyo manje ngemuva kokudlala eNdebeni yoMhlaba (Under 20).
“Ungumdlali ohluke ngokuphelele. Manje useyazethemba kakhulu,” kuphawula uKhumalo.
“Umdlalo wakhe, ngesikhathi ekhushulelwa eqenjini elikhulu, ububona ukuthi akanawo amava futhi uyazingabaza.
“Ubesenobungane obuncane, kodwa ngicabanga ukuthi usezuze ulwazi oluningi manje, futhi useyazethemba ngokukhahlelela ipali…”
UDoctor Khumalo uthi lo mfanyana udlala kahle uma ezoqhamuka maphakathi nenkundla, hhayi ophikweni la adlaliswa khona njengamanje.
“Ngicabanga ukuthi ushaye igoli bebhekene ne-Orbit College. Usethuthukile impela ngokwamava.
“Ngibone uMfundo ohlukile ngesikhathi edlala eNdebeni yoMhlaba ka-Under 20 ngoba ubengadlali ophikweni.
“Ubesetshenziswa njengomdlali oqala iminyakazo yokuhlasela, enguNombolo 10. Sawashaya kanjalo amagoli amahlanu sibhekene neNew Caledonia, ngenxa yakhe.
“Ngakho-ke, kuba wusizo kakhulu uma ephakathi nendawo kunasophikweni,” kwengeza le ngwazi yeBafana Bafana.
Amakhosi asendaweni yesithathu kuGroup D, njengoba neZESCO United yaseZambia nayo ihlulwe elinye iqembu lase-Egypt, iZamalek.
FUNDA NALA | IPirates isigxile kwiligi
IChiefs izokwamukela iZamalek emdlalweni wayo wesibili ePeter Mokaba Stadium ePolokwane ngeSonto ntambama.
ZITHOLE ZISHISA: Cofa lapha usithole kwiWhatsApp Channel yethu
