Ingwazi yePirates neseluleko esimqoka kuDansin
Owayeyisihlabani se-Orlando Pirates, uBenedict Vilakazi usenikeze isihlabani esisafufusa uCemran Dansin iseluleko esibalulekile mayelana nendlela yokubhekana nengcindezi.
UCemran Dansin uqale umdlalo kungalindele muntu kwi-Orlando Pirates ngesikhathi ibambana ngo 1-1 neMamelodi Sundowns ngempelasonto edlule.
Nokho ube ngumhlengi weBhakabhaka, eshaya igoli lokulinganisa ngemuva kokuthi iSundowns ihambe phambili kulo mdlalo weBetway Premiership.
UVilakazi nokho unomuzwa wokuthi naphezu kwegoli, akukho okunye uDansin akunike iqembu kulo mdlalo.
“Kulo mfana uDansin… wenze kahle ngokushaya igoli mfana wami – akekho ongakuphika lokho,” kusho uVilakazi kwi-Omni Sports.
“Kodwa esimweni somdlalo ngokuphelele, ngicabanga ukuthi umdlalo umgwinyile umfana. Angibonanga ukuthi wenzeni ngaphandle kwegoli.
“Ngizokhuluma iqiniso nje, ngawubuka umdlalo futhi nalapho ngifika ekhaya, ngaphinde ngawubuka kahle sengiwuphinda.
“Ngesinye isikhathi… ngoba ubeyalelwe ukugada uMarcelo Allende kodwa bengizobona uMasindi Nemtajela eno-Allende, kodwa uDansin naye ebekhona lapho.
“Ngakho bese bebabili ku-Allende futhi wonke umuntu ubonile ukuthi umfana ubengemuhle kahle, yingakho uNemtajela kudingeke ayomlekelela.
“UNemtajela ubeshiya lapho bekumele ngabe ukhona no-Aubass ayobheka u-Allende.”
UVilakazi uthe uhlelo lomqeqeshi wePirates u-Adbeslam Ouaddou lusebenze kahle ekuqinisekiseni ukuthi uDansin akaveli obala uma ehluleka.
Unxenxwa ukuthi azithobe, azikhandle
Uphinde weluleka uDansin obonakale ekhombisa abalandeli ukuthi abathule ngesikhathi ebungaza igoli lakhe.
“Umqeqeshi uyamthanda lo mfana, futhi umthanda ngoba angaba umdlali wasesiswini ophambili,” kwengeza uVilakazi.
“Usemncane futhi udinga ukugxila. WeDansin, ake ngikutshele okuthile mfana wami. Okwenzeka kuwe kwenzeka nakubadlali abaphambili emhlabeni.
“Udinga nje ukwazi ukuthi, uma ungenzi kahle namuhla, zama ukuzikhandla nje, uqhubeke nokusebenza.
“Uma uzithola ukuzithola ukuleso simo, kufanele uqhubeke nokuzama, uzithobe futhi usebenze ngokuzikhandla.”
FUNDA NALA | UShabalala udalula imfihlo yefomu yeChiefs
UDansin kulindeleke ukuthi aphinde abe seqenjini elizoqala umdlalo uma iPirates isihlangana neGolden Arrows eKing Zwelithini Stadium eThekwini ngoLwesithathu ebusuku.
Kodwa njengoba u-Ouaddou ekholelwa kakhulu ekulishintsheni iqembu lakhe, ngeke kuthuse ukuthi abe sebhentshini bese indawo ithathwe uThalente Mbatha noma uSipho Mbule.
ZITHOLE ZISHISA: Cofa lapha usithole kwiWhatsApp Channel yethu
