IGalaxy isisithathile isinqumo ngoPhakamani Mahlambi
Umqeqeshi weTS Galaxy, u-Adnan Beganovic usekuqinisekisile ukuthi le kilabhu isisithathile isinqumo ngoPhakamani Mahlambi ebimhlola.
Lo mdlali oneminyaka engu-28 ubudala ubezilolonga neTS Galaxy kusukela ngoNovemba 2025.
Lokhu bekuyingxenye yomzamo wakhe wokuvuselela umsebenzi wakhe ngemuva kwesikhathi eside engadlali ezingeni eliphezulu.
UPhakamani Mahlambi ugcine ukubonakala emdlalweni osemthethweni kwiPSL ngoSepthemba 2021 ngesikhathi esekwiChippa United.
Le nsizwa yaKwaZulu-Natal yake yathathwa njengomunye wabadlali baseNingizimu Afrika abazogqama kakhulu ngesikhathi ekwiMamelodi Sundowns ne-Al Ahly.
Nokho ukulimala nezinselelo zempilo yodumo kwaphazamisa umsebenzi kaMahlambi nokuphethe ngokuthi ahlale iminyaka eminingi engadlali.
I-TS Galaxy ibizama ukumnika indlela yokubuyela ebholeni elikhokhelayo, kodwa izinto azihambanga ngendlela obekufiswa ngayo.
UMahlambi ubesekwa ngaphakathi eqenjini, okukhona kulo nomfowabo omncane uSeluleko, ongomunye wabadlali abavelele kwiRockets kule sizini.
Nokho, uBeganovic uvumile ukuthi ikilabhu ibingeke ikwazi ukulinda isikhathi eside ukuze lo mdlali afinyelele ezingeni elidingekayo lePSL futhi isinqume ukumdedela.
“Sizamile ngempela,” kusho uBeganovic. “Samnika isikhathi futhi sasebenza naye isinyathelo ngesinyathelo, kodwa ngemva kwezinyanga ezimbili sahlaziya yonke into.
“Sibheke uhlelo lwakhe lokuziqeqesha, imidlalo yobungane nezibalo ze-GPS — sabe sesibona ukuthi kunzima ukumfikisa ezingeni esilidingayo.
“Asinaso isikhathi sokulinda unyaka bese sithemba ukuthi mhlawumbe angasisiza,” kwengeza lo mqeqeshi.
Umqeqeshi weTS Galaxy wengeze ngokuthi uMahlambi usenayo indlela yokubuyela ebholeni eliphezulu.
Kodwa umeluleke ngokuthi kumele athole iqembu emazingeni aphansi la ezosheshe athole khona isikhathi sokudlala bese ezakha kabusha.
“Uma ehlala esesimweni esihle ngokwempilo futhi egxilile, cishe udinga unyaka owodwa noma emibili,” kuchaza uBeganovic.
“Kungaba ngcono kuye ukuthola ikilabhu esigabeni sesibili noma sesithathu ukuze aqale ukudlala imidlalo futhi akhe kabusha ukuzethemba kwakhe.”
FUNDA NALA | Kunconywa oweZesco omataniswa nawePSL
UPhakamani Mahlambi manje kulindeleke ukuthi ahlole ezinye izindlela zokubuyela ebholeni njengoba eqhubeka nokuthungatha ukubuyela ebholeni elikhokhelayo.
